Zaburi 80 - Bibiliya Yera

¹ Zaburi iyi yahimbiwe umutware w'abaririmbyi babwirisha inanga ijwi ryitwa “Ibyahamijwe ni nk'amarebe”. Ni Zaburi ya Asafu.

² Wa mwungeri w'Abisirayeli we, tege ugutwi, Ni wowe ushorera Abayosefu nk'umukumbi, Yewe wicara hejuru y'Abakerubi, rabagirana.

³ Imbere y'Abefurayimu n'Ababenyamini n'Abamanase, Kangura imbaraga zawe uze udukize.

⁴ Mana, utwigarurire, Umurikishe mu maso hawe natwe turakira.

⁵ Uwiteka Mana Nyiringabo, Uburakari bwawe buzageza he gucumbira ku ugusenga k'ubwoko bwawe?

⁶ Wabagaburiye amarira menshi nk'umutsima, Wabahaye amarira menshi yo kunywa.

⁷ Utugize rurwanirwa rw'abaturanyi bacu, Abanzi bacu badusekera hamwe.

⁸ Mana Nyiringabo, utwigarurire, Umurikishe mu maso hawe natwe turakira.

⁹ Wakuye umuzabibu muri Egiputa, Wirukana amahanga urawutera.

¹⁰ Uharura imbere yawo, Na wo ushora imizi wuzura igihugu.

¹¹ Imisozi itwikīrwa n'igicucu cyawo, N'imyerezi y'Imana iterwa igicucu n'amashami yawo.

¹² Ugaba amashami agera no ku nyanja, Kandi amashami yawo agera no kuri rwa ruzi.

¹³ Ni iki cyatumye usenya inzitiro zawo, Ngo abahisi bose bawusorome?

¹⁴ Ingurube yo mu ishyamba irawangiza, Inyamaswa zo mu gasozi zirawona.

¹⁵ Mana Nyiringabo, turakwinginze garuka, Urebe mu isi, uri mu ijuru ubirebe, Ugenderere uwo muzabibu.

¹⁶ Rinda icyo ukuboko kwawe kw'iburyo kwateye, N'ishami wikomereje.

¹⁷ Uwo muzabibu waratwitswe, waraciwe, Barimburwa no guhana ko mu maso hawe.

¹⁸ Ukuboko kwawe kube ku muntu wo mu kuboko kwawe kw'iburyo, Umwana w'umuntu wikomereje.

¹⁹ Nuko rero natwe ntituzasubira inyuma ngo tuguhararuke, Tuzure natwe turambaza izina ryawe.

²⁰ Uwiteka, Mana Nyiringabo utwigarurire, Umurikishe mu maso hawe natwe turakira.