Zaburi 8 - Bibiliya Yera

¹ Zaburi iyi yahimbiwe umutware w'abaririmbyi babwirisha inanga ijwi ryitwa Gititi. Ni Zaburi ya Dawidi.

² Uwiteka Mwami wacu, Erega izina ryawe ni ryiza mu isi yose! Washyize icyubahiro cyawe hejuru y'ijuru.

³ Akanwa k'abana bato n'abonka wagahaye gukomeza imbaraga zawe, Gutsindisha abanzi bawe, Kugira ngo uhoze umwanzi n'uhōra inzigo.

⁴ Iyo nitegereje ijuru, umurimo w'intoki zawe, N'ukwezi n'inyenyeri, ibyo waremye,

⁵ Umuntu ni iki ko umwibuka, Cyangwa umwana w'umuntu ko umugenderera?

⁶ Wenze kumugira nk'Imana aburaho hato, Umwambika ubwiza n'icyubahiro nk'ikamba.

⁷ Wamuhaye gutegeka ibyo waremesheje intoki zawe, Wamweguriye ibintu byose ubishyira munsi y'ibirenge bye.

⁸ Wamuhaye gutwara intama zose n'inka, N'inyamaswa zo mu ishyamba na zo,

⁹ N'ibiguruka mu kirere n'amafi yo mu nyanja, N'ibinyura mu nzira zo mu nyanja byose.

¹⁰ Uwiteka Mwami wacu, Erega izina ryawe ni ryiza mu isi yose!