Zaburi 78 - Bibiliya Yera

¹ Indirimbo ya Asafu yahimbishijwe ubwenge. Bwoko bwanjye, nimwumve amategeko yanjye, Nimutegere amatwi amagambo yo mu kanwa kanjye.

² Ndabumbura akanwa mbacire imigani, Ndavuga amagambo aruhije ya kera.

³ Ibyo twumvise tukamenya, Ibyo ba sogokuruza batubwiye,

⁴ Ntituzabihisha abuzukuruza babo, Tubwire ab'igihe kizaza ishimwe ry'Uwiteka, N'imbaraga ze n'imirimo itangaza yakoze.

⁵ Kuko yakomeje guhamya mu Bayakobo, Yashyizeho itegeko mu Bisirayeli, Iryo yategetse ba sogokuruza, Ngo babibwire abana babo,

⁶ Kugira ngo ab'igihe kizaza bazabimenye, Ni bo bana bazavuka, Ngo na bo bazahaguruke, Babibwire abana babo,

⁷ Kugira ngo biringire Imana, Kandi batibagirwa ibyo Imana yakoze, Ahubwo bitondere amategeko yayo.

⁸ Be kuba nka ba sekuruza, Ab'igihe cy'ibigande cy'abagome, Batiboneza imitima, Imitima yabo idakiranukira Imana.

⁹ Abefurayimu batwaye intwaro n'imiheto, Basubiye inyuma ku munsi w'intambara.

¹⁰ Ntibitondeye isezerano ry'Imana, Banze kugendera mu mategeko yayo.

¹¹ Bibagiwe ibyo yakoze, N'imirimo yayo itangaza yaberetse.

¹² Yakoreye ibitangaza mu maso ya ba sekuruza, Mu gihugu cya Egiputa, mu kigarama cy'i Zowani.

¹³ Yatandukanije inyanja ibacisha hagati yayo, Ihagarika amazi nk'ikirundo.

¹⁴ Kandi ku manywa yabayobozaga igicu, Ijoro ryose ikabayoboza kumurika k'umuriro.

¹⁵ Yasaturiye ibitare mu butayu, Ibanywesha amazi menshi ava ikuzimu.

¹⁶ Kandi yavushije amasōko mu gitare, Itembesha amazi nk'imigezi.

¹⁷ Ariko bagumya kuyicumuraho, Kugomerera Isumbabyose mu gihugu gikakaye.

¹⁸ Bagerageresha Imana imitima yabo, Bayigerageresha gusaba ibyokurya byo guhaza kwifuza kwabo.

¹⁹ Bagaya Imana bati “Mbese Imana ibasha gutunganiriza ameza mu butayu?

²⁰ Dore yakubise cya gitare amazi aradudubiza, Imigezi iratemba. Mbese yabasha kuduha n'umutsima? Izabonera ubwoko bwayo inyama?”

²¹ Ni cyo cyatumye Uwiteka arakara abyumvise, Umuriro ugacanwa wo gutwika Abayakobo, Umujinya ugacumba ku Bisirayeli,

²² Kuko batizeye Imana, Kandi ntibiringire agakiza kayo.

²³ Ariko itegeka ibicu byo hejuru, Ikingura inzugi z'ijuru,

²⁴ Ibagushiriza manu yo kurya, Ibaha ku masaka yo mu ijuru,

²⁵ Bose barya umutsima w'abakomeye, Iboherereza ibyokurya byo kubahaza rwose.

²⁶ Ihuhisha mu ijuru umuyaga uturutse iburasirazuba, Iyoboza ubutware bwayo umuyaga uturutse ikusi.

²⁷ Kandi ibamanurira inyama nyinshi nk'umukungugu, N'inyoni ziguruka nyinshi, Zimeze nk'umusenyi wo ku nyanja,

²⁸ Izigusha hagati mu rugo rw'amahema yabo, Zigota aho bari.

²⁹ Nuko bararya barahaga cyane, Yabahaye ibyo bifuje.

³⁰ Bari bataratandukana no kwifuza kwabo, Ibyokurya byabo byari bikiri mu kanwa kabo,

³¹ Umujinya w'Imana urabahagurukira, Wica abanini bo muri bo, Urimbura abasore bo mu Bisirayeli.

³² Nubwo ibyo byababayeho bagumya gucumura, Ntibizera imirimo yayo itangaza,

³³ Bituma irangiza iminsi yabo nk'umwuka, N'imyaka yabo iyirangirisha kurimbuka kubatunguye.

³⁴ Uko yabicaga babaririzaga ibyayo, Bakagaruka bakazindukira gushaka Imana,

³⁵ Bakibuka yuko Imana ari yo gitare cyabo, Kandi yuko Imana Isumbabyose ari umucunguzi wabo.

³⁶ Ariko bayishyeshyeshaga akanwa kabo, Bakayibeshyeshya indimi zabo,

³⁷ Kuko imitima yabo itayitunganiye, Kandi batari abanyamurava mu isezerano ryayo.

³⁸ Ariko yo kuko yuzuye imbabazi, Ibabarira gukiranirwa kwabo ntiyabarimbura, Kandi kenshi isubiza inyuma uburakari bwayo, Ntikangure umujinya wayo wose.

³⁹ Nuko yibuka yuko ari abantu buntu, N'umuyaga uhita ntugaruke.

⁴⁰ Erega ni kenshi bayigomereraga mu butayu, Bayibabarizaga ahatagira abantu,

⁴¹ Bagahindukira bakagerageza Imana, Bakarakaza Iyera ya Isirayeli.

⁴² Ntibibukaga ukuboko kwayo, Cyangwa umunsi yabacunguriyemo, ikabakiza abanzi,

⁴³ Kandi yuko yashyize ibimenyetso byayo muri Egiputa, N'ibitangaza byayo mu kigarama cy'i Zowani,

⁴⁴ Igahindura inzuzi z'ab'aho amaraso, N'imigezi yabo ntibabashe kuyinywaho.

⁴⁵ Yaboherejemo amarumbo y'isazi zirabarya, N'ibikeri birabarimbura.

⁴⁶ Kandi iha ubuzikira imyaka yabo, N'imirimo yabo iyiha inzige.

⁴⁷ Yicisha imizabibu yabo urubura, N'imishikima yabo iyicisha imbeho.

⁴⁸ Itanga inka zabo ngo zicwe n'urubura, N'imikumbi yabo ngo ikubitwe n'inkota zotsa.

⁴⁹ Ibatera uburakari bwayo bukaze, Umujinya n'uburakari n'ibyago, Umutwe w'abamarayika b'abarimbuzi.

⁵⁰ Iharurira uburakari bwayo inzira, Ntiyakiza ubugingo bwabo urupfu, Ahubwo iha indwara yanduza ubugingo bwabo.

⁵¹ Ikubita abana b'imfura bose bo muri Egiputa irabica, Abo gukomera kwabo kwatangiriyeho bo mu mahema ya Hamu.

⁵² Ariko ubwoko bwayo, ubwayo ibushorera nk'intama ibakurayo, Ibayoborera mu butayu nk'umukumbi.

⁵³ Ibayobora amahoro bituma badatinya, Maze inyanja irengera ababisha babo.

⁵⁴ Kandi ibajyana ku rugabano rw'ahera hayo, Kuri uyu musozi ukuboko kwayo kw'iburyo kwahinduye,

⁵⁵ Yirukana amahanga imbere yabo, Ibagereshereza imigozi igihugu cyabo kuba umwandu wabo, Iturisha imiryango y'Abisirayeli mu mahema y'abo ngabo.

⁵⁶ Ariko Abisirayeli bagerageza Imana Isumbabyose barayigomera, Ntibitondera ibyo yahamije,

⁵⁷ Ahubwo basubira inyuma, Bava mu isezerano nka ba sekuruza, Barateshuka nk'umuheto uhemukira nyirawo.

⁵⁸ Kuko bayirakarishije gusengera ahantu habo ho ku mpinga z'imisozi, Bayiteje ishyari ibishushanyo byabo bibajwe.

⁵⁹ Imana ibyumvise irarakara, Yanga Abisirayeli urunuka,

⁶⁰ Bituma ireka ubuturo bw'i Shilo, Ari bwo hema yabambye hagati y'abantu.

⁶¹ Itanga imbaraga zayo ngo zijyanwe ho iminyago, N'icyubahiro cyayo ngo gifatwe n'amaboko y'ababisha,

⁶² Kandi itanga n'abantu bayo ngo bicwe n'inkota, Irakarira umwandu wayo.

⁶³ Umuriro utwika abasore babo, Abakobwa babo ntibagira indirimbo y'ubukwe,

⁶⁴ Abatambyi babo bicwa n'inkota, Abapfakazi babo ntibababorogera.

⁶⁵ Maze Umwami Imana irakanguka nk'uwasinziriye, Nk'intwari ivugishwa cyane na vino,

⁶⁶ Ikubita ababisha bayo, ibasubiza inyuma, Ibakoza isoni zidashira.

⁶⁷ Kandi yanga ihema rya Yosefu, Ntiyatoranya umuryango wa Efurayimu

⁶⁸ Ahubwo itoranya umuryango wa Yuda, Umusozi wa Siyoni yakunze.

⁶⁹ Yubaka Ahera hayo hadatsembwa nk'ijuru, Nk'isi yashimangiye iteka.

⁷⁰ Kandi itoranya Dawidi umugaragu wayo, Imukura mu ngo z'intama,

⁷¹ Kandi imukura ku gukurikira intama zonsa, Kugira ngo aragire Abayakobo ubwoko bwayo, Abisirayeli umwandu wayo.

⁷² Nuko abaragirisha umutima utunganye, Abayoboza ubwenge bw'amaboko ye.