Zaburi 77 - Bibiliya Yera

¹ Zaburi iyi yahimbiwe umutware w'abaririmbyi mu buryo bwa Yedutuni Ni Zaburi ya Asafu.

² Ndatakira Imana n'ijwi ryanjye, Ndatakira Imana n'ijwi ryanjye, Na yo irantegera ugutwi.

³ Ku munsi w'umubabaro wanjye nashatse Umwami Imana, Nijoro nayitegeye amaboko sinacogora, Umutima wanjye wanga kumarwa umubabaro.

⁴ Nibuka Imana ngahagarika umutima, Ndaganya umutima wanjye ukagwa isari. Sela.

⁵ Ufata ibihene by'amaso yanjye kugira ngo bidahumiriza, Mfite umubabaro utuma ntabasha kuvuga.

⁶ Njya nibwira iminsi ya kera, Imyaka y'ibihe bya kera.

⁷ Nibuka indirimbo yanjye ya nijoro, Nkibwira mu mutima, Umwuka wanjye wibazanya umwete uti

⁸ “Umwami azaduta iteka ryose? Ntazongera kutwishimira ukundi?

⁹ Imbabazi ze zagiye rwose iteka ryose? Isezerano rye ryapfuye ibihe byose?

¹⁰ Imana yibagiwe kugira neza? Umujinya wayo utumye ikingirana imbabazi zayo?” Sela.

¹¹ Maze ndavuga nti “Ibyo ni indwara y'umutima wanjye. Mbega natekereje yuko ukuboko kw'iburyo kw'Isumbabyose guhinduka!”

¹² Nzibutsa abantu ibikomeye Uwiteka yakoze, Kuko nzibuka ibitangaza byawe bya kera.

¹³ Kandi nzibwira ibyo wakoze byose, Nzita ku bikomeye wakoze.

¹⁴ Mana, inzira yawe iri ahera, Ni nde mana ikomeye ihwanye n'Imana Rurema?

¹⁵ Ni wowe Mana ikora ibitangaza, Wamenyekanishije imbaraga zawe mu mahanga.

¹⁶ Wacunguje ubwoko bwawe ukuboko kwawe, Ni bwo bene Yakobo na Yosefu. Sela.

¹⁷ Mana, amazi yarakurebye, Amazi yarakurebye aratinya, Imuhengeri hahinda umushyitsi,

¹⁸ Ibicu bisuka amazi, Ijuru rirahinda, Imyambi yawe irashwara.

¹⁹ Ijwi ry'inkuba yawe ryari muri serwakira, Imirabyo yawe imurikira isi, Isi ihinda umushyitsi iratigita.

²⁰ Inzira yawe yari mu nyanja, Inzira zawe zari mu mazi y'isanzure, Ibirenge byawe ntibyamenyekanye.

²¹ Wayoboje ubwoko bwawe nk'umukumbi, Ukuboko kwa Mose na Aroni.