Zaburi 76 - Bibiliya Yera

¹ Zaburi iyi yahimbiwe umutware w'abaririmbyi babwira inanga. Ni indirimbo ya Asafu yitwa Zaburi.

² Mu Bayuda Imana iramenyekana, Mu Bisirayeli izina ryayo rirakomeye.

³ Kandi i Salemu ni ho hema ryayo, I Siyoni ni ho buturo bwayo.

⁴ Ni ho yameneye imirabyo yo mu muheto, N'ingabo n'inkota n'intwaro z'intambara. Sela.

⁵ Uri uw'icyubahiro n'ubwiza bwinshi, Utabarutse mu misozi y'iminyago.

⁶ Intwari mu mitima ziranyazwe zisinzira ubuticura, Kandi nta bo mu banyambaraga babonye amaboko yabo.

⁷ Mana ya Yakobo, Gucyaha kwawe kwatumye amagare n'amafarashi bisinzirira guhwera.

⁸ Wowe ni wowe uteye ubwoba, Ni nde ubasha guhagarara imbere yawe igihe urakaye?

⁹ Wumvikanishije amateka uri mu ijuru, Isi yaratinye iraceceka,

¹⁰ Ubwo Imana yahagurutswaga no guca amateka, Ngo ikize abagwaneza bo mu isi bose. Sela.

¹¹ Ni ukuri umujinya w'abantu uzagushimisha, Umujinya uzasigara uzawukenyera.

¹² Muhige umuhigo muwuhigure Uwiteka Imana yanyu, Abayigose bose bazanire amaturo Iteye ubwoba.

¹³ Izarimbura imyuka y'abakomeye, Ni yo iteye ubwoba abami bo mu isi.