Zaburi 75 - Bibiliya Yera

¹ Zaburi iyi yahimbiwe umutware w'abaririmbyi babwirisha inanga ijwi ryitwa “Witsemba.” Ni indirimbo ya Asafu yitwa Zaburi.

² Mana, turagushima, Turagushimira kuko izina ryawe riri bugufi, Abantu bamamaza imirimo itangaza wakoze.

³ “Nimbona igihe cyashyizweho, Nzaca imanza zitabera.

⁴ Isi n'abayibamo bose bacikamo igikuba, Ni jye wateye inkingi zayo. Sela.

⁵ Mbwira abibone nti ‘Ntimukībone’, N'abanyabyaha nti ‘Ntimugashyire hejuru amahembe yanyu.

⁶ Ntimugashyire hejuru cyane amahembe yanyu, Ntimukavuge iby'agasuzuguro mugamitse ijosi.’ ”

⁷ Kuko agakiza kadaturuka iburasirazuba cyangwa iburengerazuba, Cyangwa mu butayu bw'imisozi,

⁸ Ahubwo Imana ni yo mucamanza, Icisha umwe bugufi igashyira undi hejuru.

⁹ Kuko mu ntoki z'Uwiteka hariho agacuma karimo vino ibira, Kuzuye vino ivanze n'ibiyiryoshya arayisuka. Ni ukuri abanyabyaha bo mu isi, Baziranguza itende ryayo barinywe.

¹⁰ Ariko jyeweho iteka nzajya namamaza ibyo, Nzaririmbira Imana ya Yakobo ishimwe.

¹¹ Kandi amahembe yose y'abanyabyaha nzayaca, Ariko amahembe y'abakiranutsi azashyirwa hejuru.