Zaburi 74 - Bibiliya Yera

¹ Zaburi iyi ni indirimbo ya Asafu yahimbishijwe ubwenge. Mana, ni iki cyakudutesheje iteka? Ni iki gituma umujinya wawe ugirira intama zo mu cyanya cyawe, ucumba umwotsi?

² Ibuka iteraniro ryawe waguze kera, Iryo wacunguriye kuba ubwoko bwawe bw'umwandu, N'umusozi wa Siyoni watuyeho.

³ Shingura ibirenge byawe ujye mu matongo y'iteka, Ababisha bakoreye ahera ibibi byose.

⁴ Ababisha bawe batontomeye hagati y'inzu twateraniragamo kugusenga, Bashingiye amabendera yabo kuba ibimenyetso.

⁵ Basa nk'abantu bamanikira intorezo, Gutema ibiti by'intsikane.

⁶ None isuku y'ababaji y'aho yose, Barayimenaguza intorezo n'inyundo.

⁷ Batwitse Ahera hawe, Bahumanishije ubuturo bw'izina ryawe kubusenya rwose.

⁸ Baribwiye bati “Tubarimbure rwose”, Batwitse amazu yose yo mu gihugu, Twateraniragamo gusenga Imana.

⁹ Ntitureba ibimenyetso byacu, Nta muhanuzi ukiriho, Kandi nta n'umwe muri twe uzi aho ibyo bizagarukira.

¹⁰ Mana, umubisha azageza he kudutuka? Umwanzi azatuka izina ryawe iteka?

¹¹ Ni iki gituma uhina ukuboko, Ukuboko kwawe kw'iburyo? Gukure mu gituza cyawe ubarimbure.

¹² Ariko Imana yahoze ari Umwami wanjye na kera, Ikorera iby'agakiza hagati y'isi.

¹³ Ni wowe watandukanishije inyanja imbaraga zawe, Wameneye imitwe y'ibinyamaswa mu mazi.

¹⁴ Ni wowe wamenaguye imitwe ya Lewiyatani, Warayitanze iba ibyokurya by'ibyo mu butayu.

¹⁵ Ni wowe watoboye isōko n'umugezi, Wakamije inzuzi zidakama.

¹⁶ Amanywa ni ayawe kandi n'ijoro ni iryawe, Waremye umucyo n'izuba.

¹⁷ Ni wowe washyizeho ingabano zose z'isi, Waremye icyi n'itumba.

¹⁸ Ibuka ibi yuko ababisha bacyashye Uwiteka, Ishyanga ritagira ubwenge ryatutse izina ryawe.

¹⁹ Ntuhe inyamaswa ubugingo bw'inuma yawe, Ntiwibagirwe ubugingo bw'abanyamubabaro bawe iteka ryose.

²⁰ Ite kuri rya sezerano, Kuko ahantu h'umwijima ho mu isi huzuye ubuturo bw'urugomo.

²¹ Uhatwa ye kugaruka akojejwe isoni, Umunyamubabaro n'umukene bashime izina ryawe.

²² Mana, haguruka wiburanire, Ibuka yuko umupfapfa yiriza umunsi agutuka.

²³ Ntiwibagirwe amajwi y'ababisha bawe, Urusaku rw'abaguhagurukira rutumbagira iteka.