Zaburi 73 - Bibiliya Yera

IGICE CYA GATATU

¹ Zaburi iyi ni iya Asafu. Ni ukuri Imana igirira neza Abisirayeli, Bafite imitima iboneye.

² Ariko jyeweho, Ibirenge byanjye byari bugufi bwo guhanuka, Intambwe zanjye zari zishigaje hato zikanyerera.

³ Kuko nagiriraga ishyari abibone, Ubwo narebaga abanyabyaha baguwe neza.

⁴ Kuko batababazwa mu ipfa ryabo, Ahubwo imbaraga zabo zirakomera.

⁵ Ntibagira imibabaro nk'abandi, Ntibaterwa n'ibyago nk'abandi.

⁶ Ni cyo gituma ubwibone buba nk'urunigi mu majosi yabo, Urugomo rukabatwikīra nk'igishura.

⁷ Amaso yabo avanywe imutwe no kubyibuha kwabo, Bafite ibiruta ibyo umutima w'umuntu wakwifuza.

⁸ Barakoba bakavugishwa iby'agahato no gukiranirwa kwabo, Bavuga iby'ubwibone.

⁹ Bashyize akanwa kabo mu ijuru, Ururimi rwabo ruzerera mu isi yose.

¹⁰ Ni cyo gituma abantu be bagaruka aho, Bakamara amazi yuzuye mu gikombe,

¹¹ Bakavuga bati “Imana ikibwirwa n'iki? Isumbabyose hari icyo izi?”

¹² Dore abo ni bo banyabyaha, Kandi kuko bagira amahoro iteka bagwiza ubutunzi.

¹³ Ni ukuri nogereje ubusa umutima wanjye, Kudacumura nagukarabiye ubusa.

¹⁴ Kuko natewe n'ibyago umunsi ukira, Ngahanwa ibihano mu bitondo byose.

¹⁵ Iyaba naravuze nti “Reka mvuge ntyo”, Mba narahemukiye ubwoko bw'abana bawe.

¹⁶ Natekereje uko nabasha kubimenya, Birandushya birananira,

¹⁷ Kugeza aho nagiriye ahera h'Imana, Nkita ku iherezo rya ba bandi.

¹⁸ Ni ukuri ubashyira ahanyerera, Urabagusha bagasenyuka.

¹⁹ Erega bahindutse amatongo mu kanya gato! Ubwoba bw'uburyo bwinshi burabatsembye rwose.

²⁰ Nk'uko inzozi zimeze iyo umuntu akangutse, Ni ko nawe Mwami nukanguka, Uzasuzugura icyubahiro cyabo cy'igicucu.

²¹ Ubwo umutima wanjye washariraga, Nkibabaza mu mutima,

²² Nari umupfapfa nta bwenge nagiraga, Nameraga nk'inka imbere yawe.

²³ Ariko none ndi kumwe nawe iteka, Umfashe ukuboko kw'iburyo.

²⁴ Uzanyoboza ubwenge bwawe, Kandi hanyuma uzanyakirane icyubahiro.

²⁵ Ni nde mfite mu ijuru utari wowe? Kandi mu isi nta we nishimira utari wowe.

²⁶ Umubiri wanjye n'umutima wanjye birashira, Ariko Imana ni yo gitare umutima wanjye uhungiraho, Kandi ni yo mugabane wanjye iteka ryose.

²⁷ Kuko abakujya kure bazarimbuka, Watsembye abakurekeshejwe no kurarikira bose.

²⁸ Ariko jyeweho kwegera Imana ni ko kwiza kuri jye, Umwami Uwiteka ni we ngize ubuhungiro, Kugira ngo namamaze imirimo wakoze yose.