Zaburi 72 - Bibiliya Yera

¹ Zaburi ya Salomo. Uhe umwami guca imanza kwawe, Uhe umwana w'umwami kutabera kwawe.

² Azacira abantu bawe imanza zitabera, N'abanyamubabaro bawe azabacira imanza z'ukuri.

³ Guca imanza zitabera kuzatuma imisozi miremire N'imigufi izanira abantu amahoro.

⁴ Azaca imanza zirengera abanyamubabaro bo mu bantu, Azakiza abana b'abakene, Kandi azavunagura umunyagahato.

⁵ Bazakubaha ibihe byose, Izuba n'ukwezi bikiriho.

⁶ Azamera nk'imvura imanuka ikanyagira ibyatsi biciwe, Nk'ibitonyanga bitonyangira ubutaka.

⁷ Mu minsi ye abakiranutsi bazashisha, Kandi hazabaho amahoro menshi, Kugeza aho ukwezi kuzashirira.

⁸ Azatwara ahereye ku nyanja ageze ku yindi nyanja, Kandi ahereye kuri rwa Ruzi ageze ku mpera y'isi.

⁹ Ababa mu butayu bazamwunamira, Abanzi be bazarigata umukungugu.

¹⁰ Abami b'i Tarushishi n'abami bo ku birwa bazazana amaturo, Abami b'i Sheba n'abami b'i Seba bazazana ikoro.

¹¹ Abami bose bazamwikubita imbere, Amahanga yose azamukorera.

¹² Kuko azakiza umukene ubwo azataka, N'umunyamubabaro utagira gitabara.

¹³ Azababarira uworoheje n'umukene, Ubugingo bw'abakene azabukiza.

¹⁴ Azacungura ubugingo bwabo, Abukize agahato n'urugomo, Kandi amaraso yabo azaba ay'igiciro cyinshi imbere ye.

¹⁵ Nuko azarama kandi bazamuha ku izahabu y'i Sheba, Bazamusabira iteka, Bazamusabira umugisha umunsi wire.

¹⁶ Hazabaho amasaka menshi mu gihugu no mu mpinga z'imisozi, Amahundo yayo azanyeganyega nk'ibiti byo kuri Lebanoni, Abanyamudugudu bazashisha nk'ubwatsi bwo ku butaka burabije.

¹⁷ Izina rye rizahoraho iteka ryose, Izina rye rizahamaho, izuba rikiriho, Abantu bazisabira umugisha wo guhwana na we, Amahanga yose azamwita umunyehirwe.

¹⁸ Uwiteka Imana ni yo Mana y'Abisirayeli ihimbazwe, Ni yo yonyine ikora ibitangaza.

¹⁹ Izina ryayo ry'icyubahiro rihimbazwe iteka, Isi yose yuzure icyubahiro cyayo. Amen kandi Amen.

²⁰ Ibyo Dawidi mwene Yesayi yasabye birarangiye.