Zaburi 71 - Bibiliya Yera

¹ Uwiteka, ni wowe mpungiyeho, Singakorwe n'isoni.

² Ku bwo gukiranuka kwawe unkize untabare, Untegere ugutwi unkize.

³ Umbere urutare rw'ubuturo, Aho nzabasha kujya mpungira, Wategetse kunkiza, Kuko ari wowe gitare cyanjye n'igihome kinkingira.

⁴ Mana yanjye, nyarura mu maboko y'umunyabyaha, Nyarura mu maboko y'umunyarugomo ukiranirwa.

⁵ Kuko ari wowe byiringiro byanjye Mwami Uwiteka, Ni wowe nizera uhereye mu buto bwanjye.

⁶ Ni wowe njya nishingikirizaho uhereye mu ivuka ryanjye, Ni wowe wankuye mu nda ya mama, Nzajya ngushima iminsi yose.

⁷ Ndi ishyano ritangaza benshi, Ariko ni wowe buhungiro bwanjye bukomeye.

⁸ Akanwa kanjye kazuzura ishimwe ryawe, N'icyubahiro cyawe umunsi wire.

⁹ Ntunte mu gihe cy'ubusaza, Ntundeke mu gihe intege zanjye zishize.

¹⁰ Kuko abanzi banjye bamvuga, Abubikira ubugingo bwanjye bajya inama bati

¹¹ “Imana yaramuretse, Mumwirukane, mumufate kuko atagira uwo kumukiza.”

¹² Mana, ntumbe kure, Mana yanjye, tebuka untabare.

¹³ Abanzi b'ubugingo bwanjye bakorwe n'isoni barimbuke, Abashaka kungirira nabi bambikwe ibitutsi n'igisuzuguriro.

¹⁴ Ariko jyeweho nzajya niringira iteka, Nziyongeranya iteka kugushima.

¹⁵ Akanwa kanjye kazabara inkuru yo gukiranuka kwawe, N'agakiza kawe umunsi wire, Kuko ntazi umubare wabyo.

¹⁶ Nzajya aho uri mvuge imirimo ikomeye Umwami Uwiteka yakoze, Nzavuga gukiranuka kwawe wenyine.

¹⁷ Mana, ni wowe wanyigishije uhereye mu buto bwanjye, Kugeza none ndacyavuga imirimo itangaza wakoze.

¹⁸ Mana, ntundeke kugeza igihe mera imvi z'ubusaza, Ntarabwira ab'igihe kizaza iby'amaboko yawe, Ntarabwira abazavuka bose gukomera kwawe.

¹⁹ Mana, urugero rwo gukiranuka kwawe rugera mu ijuru, Ni wowe wakoze ibikomeye, Mana, ni nde uhwanye nawe?

²⁰ Ni wowe watweretse ibyago byinshi bikomeye, Uzagaruka utuzure, Utuzamure udukure ikuzimu.

²¹ Ungwirize gukomera, Uhindukire umare umubabaro.

²² Nanjye nzagushimisha nebelu, Mana yanjye, nzashima umurava wawe. Ni wowe nzaririmbira ishimwe mbwira inanga, Uwera w'Abisirayeli we.

²³ Iminwa yanjye izishima cyane, Ubwo nzakuririmbira ishimwe, N'ubugingo bwanjye wacunguye buzishima.

²⁴ Kandi ururimi rwanjye ruzavuga gukiranuka kwawe umunsi wire, Kuko abashaka kungirira nabi bakojejwe isoni, bamwajwe.