Zaburi 69 - Bibiliya Yera

¹ Zaburi iyi yahimbiwe umutware w'abaririmbyi babwirisha inanga ijwi ryitwa “Amarebe.” Ni Zaburi ya Dawidi.

² Mana, nkiza kuko amazi ageze no ku bugingo bwanjye.

³ Ndigise mu byondo birebire, Bidafite aho umuntu yahagarara, Ngeze muri nyina umuvumbi urantembana.

⁴ Kurira kuranduhije umuhogo wanjye urumye, Amaso yanjye yarerutse ngitegereza Imana yanjye.

⁵ Abanyangira ubusa baruta umusatsi wo ku mutwe wanjye ubwinshi Abashaka kundimbura bampora impamvu z'ibinyoma barakomeye, Ni bwo narihishijwe icyo ntanyaze.

⁶ Mana, ni wowe uzi ubupfu bwanjye, Ibyaha byanjye ntubihishwa.

⁷ Mwami, Uwiteka Nyiringabo, Abagutegereza be kumwazwa n'ibyanjye, Mana y'Abisirayeli, Abagushaka be guterwa igisuzuguriro n'ibyanjye.

⁸ Kuko nihanganira ibitutsi bakuntukira, Mu maso hanjye huzuye ipfunwe.

⁹ Mpindutse umushyitsi kuri bene data, N'umunyamahanga kuri bene mama.

¹⁰ Kuko ishyaka ry'inzu yawe rindya, Ibitutsi by'abagutuka byaguye kuri jye.

¹¹ Ubwo nariraga ngahanisha umutima wanjye kwiyiriza ubusa, Byampindukiye ibitutsi.

¹² Ubwo nambaraga ibigunira, Nabaye iciro ry'imigani kuri bo.

¹³ Abicara mu marembo baramvuga, Ndi indirimbo y'abasinzi.

¹⁴ Ariko jyeweho ni wowe nsenga Uwiteka, Mana, mu gihe cyo kwemererwamo, Ku bwo kugira neza kwawe kwinshi, Unsubirishe umurava w'agakiza kawe.

¹⁵ Unsayure mu byondo ne kurigita, Nkire abanyanga nkire n'amazi maremare.

¹⁶ Umuvumba we kuntembana, Imihengeri he kumira, Rwa rwobo rwe kumbumbiraho umunwa warwo.

¹⁷ Uwiteka, unsubize kuko imbabazi zawe ari nziza, Unkebuke nk'uko kugira neza kwawe ari kwinshi.

¹⁸ Kandi jyewe umugaragu wawe ntumpishe mu maso hawe, Kuko mfite umubabaro unsubize vuba.

¹⁹ Wegere ubugingo bwanjye ubukize, Uncungure ku bw'abanzi banjye.

²⁰ Ni wowe uzi uko ntukwa, N'isoni zanjye n'igisuzuguriro cyanjye na byo urabizi, Abanzi banjye bose bari imbere yawe.

²¹ Ibitutsi byamenaguye umutima ndarwaye cyane, Nashatse uwangirira imbabazi ariko ntihaboneka n'umwe, Nashatse abo kumara umubabaro ndababura.

²² Kandi bampaye indurwe kuba ibyokurya byanjye, Ngize inyota bampa umushari wa vino.

²³ Ameza yabo imbere yabo ahinduke ikigoyi, Bakiri mu mahoro ahinduke umutego.

²⁴ Amaso yabo ahumwe batareba, Uhindishe umushyitsi ikiyunguyungu cyabo iteka.

²⁵ Ubasukeho uburakari bwawe, Umujinya w'inkazi wawe ubagereho.

²⁶ Iwabo hasigare ubusa, Kandi ntihakagire uba mu mahema yabo.

²⁷ Kuko bagenza uwo wakubise, Kandi bavuga umubabaro w'abo wakomerekeje.

²⁸ Rundanya ibyaha ku byaha byabo, Be kwinjira mu byo gukiranuka kwawe.

²⁹ Basibanganywe mu gitabo cy'ubugingo, Be kwandikanwa n'abakiranutsi.

³⁰ Ariko jyeweho ndi umunyamubabaro ndaribwa, Mana, agakiza kawe kanshyire hejuru.

³¹ Nzashimisha izina ry'Imana indirimbo, Nzayihimbarisha ishimwe ry'ibyo yankoreye.

³² Ibyo bizanezeza Uwiteka birushe impfizi, Cyangwa ikimasa gifite amahembe cyatūye inzara.

³³ Abagwaneza bazabireba bishime, Mwa bashaka Imana mwe, Imitima yanyu isubizwemo ubugingo.

³⁴ Kuko Uwiteka yumva abakene, Ntasuzugura abe bari mu nzu y'imbohe.

³⁵ Ijuru n'isi bimushime, N'inyanja n'ibizigendamo byose.

³⁶ Kuko Imana izakiza i Siyoni, Ikubaka imidugudu ya Yuda, Bazayibamo igihugu kibabere gakondo.

³⁷ Kandi urubyaro rw'abagaragu bayo ruzakiragwa, Abakunda izina ryayo bazagituramo.