Zaburi 66 - Bibiliya Yera

¹ Iyi ndirimbo yitwa Zaburi, yahimbiwe umutware w'abaririmbyi. Mwa bari mu isi yose mwe, Muvugirize Imana impundu.

² Muririmbe icyubahiro cy'izina ryayo, Mwogeze ishimwe ryayo.

³ Mubwire Imana muti “Imirimo yawe ko iteye ubwoba, Imbaraga zawe nyinshi zizatuma abanzi bawe bose bakugomokera, Bakagushyeshya.

⁴ Abo mu isi yose bazagusenga bakuririmbire, Bazaririmbira izina ryawe.” Sela.

⁵ Nimuze murebe imirimo y'Imana, Iteye ubwoba ku byo igirira abantu.

⁶ Yahinduye inyanja ubutaka, Kandi bambukishije uruzi ibirenge, Aho ni ho twayishimiriye.

⁷ Itegekesha imbaraga zayo iteka, Amaso yayo yitegereza amahanga, Abagome be kwishyira hejuru. Sela.

⁸ Mwa mahanga mwe, muhimbaze Imana yacu, Mwumvikanishe ijwi ry'ishimwe ryayo.

⁹ Irindira imitima yacu mu bugingo, Kandi ntikundira ibirenge byacu ko biteguza.

¹⁰ Kuko Mana, waratugerageje, Watuvugutiye nk'uko bavugutira ifeza.

¹¹ Wadutoje ikigoyi, Waduhekesheje umutwaro uremereye mu mugongo.

¹² Wahaye abantu kudukandagiza ku mitwe amafarashi abahetse, Twanyuze mu muriro no mu mazi, Maze udukuramo udushyira ahantu h'uburumbuke.

¹³ Ndinjirana ibitambo byokeje mu nzu yawe, Ndaguhigura umuhigo naguhize.

¹⁴ Wabumbuje iminwa yanjye, Akanwa kanjye kakawuvuga ubwo nari mu mubabaro.

¹⁵ Ndagutambira ibitambo byokeje by'amatungo abyibushye, Arimo umubabwe w'amasekurume y'intama, Ndatamba amapfizi n'ihene. Sela.

¹⁶ Mwa bubaha Imana mwese mwe, nimuze mwumve. Nanjye ndavuga ibyo yakoreye ubugingo bwanjye.

¹⁷ Nayitakirishije akanwa kanjye, Ururimi rwanjye rwarayihimbaje.

¹⁸ Iyaba naribwiraga ibyo gukiranirwa mu mutima wanjye, Uwiteka ntaba anyumviye.

¹⁹ Ariko koko Imana iranyumviye, Ityarije ugutwi ijwi ryo gusenga kwanjye.

²⁰ Imana ihimbazwe, Itanze kumva gusenga kwanjye, Kandi itankuyeho imbabazi zayo.