Zaburi 64 - Bibiliya Yera

¹ Zaburi iyi yahimbiwe umutware w'abaririmbyi. Ni iya Dawidi.

² Mana, umva ijwi ryanjye ryo kuganya, Kiza ubugingo bwanjye gutinyishwa n'umwanzi.

³ Mpisha inama z'abakora nabi bangīra rwihishwa, N'imidugararo y'inkozi z'ibibi.

⁴ Batyaje indimi zabo nk'inkota, Batamitse imyambi yabo azi yo magambo abishye,

⁵ Kugira ngo barasire utunganye mu rwihisho. Bamurasa gitunguro ntibatinya,

⁶ Bihumuririza imigambi mibi, Bajya inama zo gutega ibigoyi rwihishwa, Bakibwira bati “Ni nde uzabireba?”

⁷ Bahirimbanira kunguka inama mbi, Bakibwira bati “Tunogeje inama twungutse.” Umutima w'umuntu wese n'ibihishwe atekereza ntibirondorwa.

⁸ Ariko Imana izabarasa, Bazakomeretswa n'umwambi ubatunguye.

⁹ Uko ni ko bazasitazwa, Ururimi rwabo ubwarwo ruzabarwanya, Ababareba bose bazazunguza imitwe.

¹⁰ Kandi abantu bose bazatinya, Bavuge umurimo w'Imana, Batekerereshe ubwenge ibyo yakoze.

¹¹ Umukiranutsi azanezererwa Uwiteka amwiringire, Kandi abafite imitima itunganye bose bazirata.