Zaburi 60 - Bibiliya Yera

¹ Zaburi iyi yahimbiwe umutware w'abaririmbyi babwirisha inanga ijwi ryitwa “Irebe ryo guhamya.” Mikitamu ya Dawidi yahimbiye kwigisha,

² ubwo yarwanaga n'Abasiriya b'i Mezopotamiya n'Abasiriya b'i Soba, Yowabu akagaruka akicira mu Kibaya cy'Umunyu Abedomu inzovu n'ibihumbi bibiri.

³ Mana, uradutaye uradushenye, Wararakaye udusubizemo intege.

⁴ Wateye igihugu igishyitsi uragisatura, Ziba ubusate bwacyo kuko gitigita.

⁵ Weretse abantu bawe ibikomeye, Watunywesheje inzoga zidandabiranya.

⁶ Wahaye abakubaha ibendera, Kugira ngo bahunge umuheto. Sela.

⁷ Kirisha ukuboko kwawe kw'iburyo unsubize, Kugira ngo abo ukunda bakizwe.

⁸ Imana yarahiye kwera kwayo iti “Nzishima, nzagabanya i Shekemu, Kandi nzagabanisha urugero igikombe cy'i Sukoti.

⁹ Galeyadi ni ahanjye, Umuryango wa Manase ni uwanjye, Uwa Efurayimu ni wo ukingira umutwe wanjye, Uwa Yuda ni wo nkoni yanjye y'ubwami.

¹⁰ Abamowabu ni bo gikarabiro cyanjye, Abedomu nzabakubita inkweto mu mutwe, Filisitiya, umvugirize impundu.”

¹¹ Ni nde uzanyinjiza mu mudugudu ufite igihome gikomeye? Ni nde uzangeza Edomu?

¹² Si wowe Mana wadutaye uzangezayo? Si wowe Mana utajyanaga n'ingabo zacu uzangezayo?

¹³ Udutabare umubisha, Kuko gutabara kw'abantu kutagira umumaro.

¹⁴ Imana izadukoresha iby'ubutwari, Kuko ari yo izaribata ababisha bacu.