Zaburi 59 - Bibiliya Yera

¹ Zaburi iyi yahimbiwe umutware w'abaririmbyi babwirisha inanga ijwi ryitwa “Witsemba.” Ni Zaburi ya Dawidi yitwa Mikitamu, yahimbye ubwo Sawuli yatumaga bakarindira inzu kugira ngo bamwice.

² Mana yanjye, unkize abanzi banjye, Unshyire hejuru y'abampagurukira.

³ Unkize inkozi z'ibibi, Undinde abicanyi.

⁴ Kuko bubikira ubugingo bwanjye, Abanyambaraga bateraniye kuntera, Kandi ntazize igicumuro cyanjye, Cyangwa icyaha cyanjye, Uwiteka.

⁵ Barirukanka bakitegura batagize icyo bampora, Kanguka unsanganire ubirebe.

⁶ Ni wowe mpamagara, Uwiteka, Mana Nyiringabo, Mana y'Abisirayeli, Kangukira guhana abapagani bose, Ntugire abanyabicumuro babi ubabarira. Sela.

⁷ Bagaruka nimugoroba bagakankama nk'imbwa, Bakazenguruka umudugudu.

⁸ Dore badudubiranya amagambo mabi mu kanwa kabo, Inkota ziri mu minwa yabo, Kuko bibaza bati “Ni nde ubyumva?”

⁹ Ariko wowe Uwiteka uzabaseka, Uzakoba abapagani bose.

¹⁰ Wa mbaraga yanjye we, nzagutegereza, Kuko Imana ari yo gihome kirekire kinkingira.

¹¹ Imana mboneramo imbabazi izansanganira, Imana izanyereka ibyo nshakira abanyubikira.

¹² Ntubice kugira ngo abantu banjye batabyibagirwa, Mwami ngabo idukingira, Ubatatanishe imbaraga zawe ubacishe bugufi.

¹³ Ijambo ryose ryo mu minwa yabo ni igicumuro cy'akanwa kabo, Ubwibone bwabo bubafate nk'umutego, Imivumo n'ibinyoma bavuga na byo bibafatishe.

¹⁴ Ubatsembane umujinya, Ubatsembe be kubaho ukundi, Kugeza ku mpera y'isi hose, Bamenye yuko Imana itegeka Abayakobo. Sela.

¹⁵ Ba bandi bajye bagaruka nimugoroba bakankame nk'imbwa, Bazenguruke umudugudu.

¹⁶ Bahunahune bashake inyama, Nibadahaga bakeshe ijoro.

¹⁷ Ariko jyeweho nzaririmba imbaraga zawe, Kuko wambereye igihome kirekire kinkingira. Mu gitondo nzaririmbisha imbabazi zawe ijwi rirenga, N'ubuhungiro ku munsi w'amakuba yanjye.

¹⁸ Ni wowe wa mbaraga yanjye we, nzaririmbira ishimwe, Kuko Imana ari yo gihome kirekire kinkingira, Ni Imana mboneramo imbabazi.