Zaburi 57 - Bibiliya Yera

¹ Zaburi iyi yahimbiwe umutware w'abaririmbyi babwirisha inanga ijwi ryitwa “Witsemba.” Ni Zaburi ya Dawidi yitwa Mikitamu, yahimbye ubwo yari mu buvumo ahunze Sawuli.

² Mana, mbabarira mbabarira, Kuko ubugingo bwanjye buguhungiraho. Ni koko mu gicucu cy'amababa yawe ni ho ngiye guhungira, Kugeza aho ibi byago bizashirira.

³ Ndatakira Imana Isumbabyose, Imana inkorera byose.

⁴ Izatuma iri mu ijuru inkize, Ubwo ūshaka kumira azantuka, Sela. Imana izohereza imbabazi zayo n'umurava wayo.

⁵ Ubugingo bwanjye buri hagati y'intare, Ndyama hagati y'abaka umuriro. Abo bantu amenyo yabo ni amacumu n'imyambi, Ururimi rwabo ni inkota ityaye.

⁶ Mana, wishyire hejuru y'ijuru, Icyubahiro cyawe kibe hejuru y'isi yose.

⁷ Bateze ibirenge byanjye ikigoyi, Umutima wanjye wiyunamiriye. Bacukuye ubushya imbere yanjye, Babugwamo ubwabo. Sela.

⁸ Mana, umutima wanjye urakomeye, Umutima wanjye urakomeye, Ndaririmba, ni koko ndaririmba ishimwe.

⁹ Wa bwiza bwanjye we, kanguka, Nebelu n'inanga nimukanguke, Nanjye ubwanjye nzakanguka mbere y'umuseke.

¹⁰ Mwami, nzagushimira mu moko, Nzakuririmbirira ishimwe mu mahanga,

¹¹ Kuko imbabazi zawe ari ndende zigera no mu ijuru, Umurava wawe ugera mu bicu.

¹² Mana, wishyire hejuru y'ijuru, Icyubahiro cyawe kibe hejuru y'isi yose.