Zaburi 56 - Bibiliya Yera

¹ Zaburi iyi yahimbiwe umutware w'abaririmbyi babwirisha inanga ijwi ryitwa “Inuma iceceka y'aba kure.” Ni Zaburi ya Dawidi yitwa Mikitamu, yahimbye ubwo Abafilisitiya bamufatiraga i Gati.

² Mana, mbabarira kuko abantu bashaka kumira, Biriza umunsi bandwanya bakampata.

³ Abanzi banjye biriza umunsi bashaka kumira, Kuko abandwananya agasuzuguro ari benshi.

⁴ Uko ntinya kose nzakwiringira.

⁵ Imana izampa gushima izina ryayo, Imana ni yo niringiye sinzatinya, Abantu babasha kuntwara iki?

⁶ Biriza umunsi bagoreka amagambo yanjye, Bibwira ibyo kungirira nabi bisa.

⁷ Baraterana bakihisha, Bakaronda ibirenge byanjye, Kuko bubikiye ubugingo bwanjye.

⁸ Mbese gukiranirwa kwabo kuzabakirisha? Mana, tsinda amahanga hasi n'umujinya wawe.

⁹ Ubara kurorongotana kwanjye, Ushyira amarira yanjye mu icupa ryawe, Mbese ntiyanditswe mu gitabo cyawe?

¹⁰ Icyo gihe abanzi banjye bazasubizwa inyuma ku munsi nzatakiramo, Ibyo ndabizi kuko Imana iri mu ruhande rwanjye.

¹¹ Imana izampa gushima izina ryayo, Uwiteka azampa gushima izina rye.

¹² Imana ni yo niringiye sinzatinya, Abantu babasha kuntwara iki?

¹³ Mana, imihigo naguhize indiho, Kandi nzakwitura amaturo y'ishimwe.

¹⁴ Kuko wakijije ubugingo bwanjye urupfu, N'ibirenge byanjye wabikijije gusitara, Ngo mbone uko ngendera mu maso y'Imana mu mucyo w'ababaho.