Zaburi 55 - Bibiliya Yera

¹ Zaburi iyi yahimbiwe umutware w'abaririmbyi babwira inanga. Ni Zaburi ya Dawidi yahimbishijwe ubwenge.

² Mana, tegera ugutwi gusenga kwanjye, Ntiwirengagize kwinginga kwanjye.

³ Nyitaho unsubize, Kwiganyira bintera gukora hirya no hino, bikanihisha,

⁴ Ku bw'ijwi ry'umwanzi, Ku bw'agahato k'abanyabyaha, Kuko banteza amakuba, Bakangenzanya umujinya.

⁵ Umutima wanjye urambabaza cyane, Ubwoba bwinshi bunguyeho nk'ubw'ūtinya urupfu.

⁶ Gutinya no guhinda imishyitsi bingezeho, Gukangarana kuramiranije.

⁷ Ndavuga nti “Icyampa nkagira amababa nk'inuma, Mba ngurutse nkaruhuka.

⁸ Dore mba ndorongotaniye kure, Nkarara mu butayu. Sela.

⁹ Mba mpungiye vuba mu buhungiro, Nkikinga umuyaga w'ishuheri n'umugaru.”

¹⁰ Mwami, ubamire uyoberanye indimi zabo, Kuko nabonye urugomo no kurwana mu mudugudu.

¹¹ Ku manywa na nijoro bigendagenda hejuru y'inkike zawo, Kandi gukiranirwa n'igomwa biri hagati yawo.

¹² Gukora ibyaha kuri hagati yawo, Agahato n'uburiganya ntibiva mu nzira zo muri wo.

¹³ Si umwanzi wantutse, Mba narabashije kwihangana, Cyangwa uwanyangaga si we wanyirase hejuru, Mba naramwihishe.

¹⁴ Ahubwo ni wowe uwo duhwanye, Uwo twagendanaga, incuti yanjye y'amagara.

¹⁵ Twaganiraga tunezerewe, Tukagendagendana n'iteraniro mu nzu y'Imana.

¹⁶ Urupfu rubatungure, Bamanuke bajye ikuzimu bakiri bazima, Kuko gukora ibyaha kuri mu mazu yabo no mu mitima yabo.

¹⁷ Jyeweho nzambaza Imana, Uwiteka azankiza.

¹⁸ Nimugoroba no mu gitondo no ku manywa y'ihangu, Nzajya muganyira niha, Na we azumva ijwi ryanjye.

¹⁹ Yacunguriye ubugingo bwanjye amahoro, Kugira ngo batanyegera, Kuko abandwanyaga ari benshi.

²⁰ Imana izanyumva ibacishe bugufi, Ni yo ihora yicaye ku ntebe y'ubwami uhereye kera kose, Sela. Izacisha bugufi abadahindurwa ntibubahe Imana.

²¹ Wa muntu yaramburiye amaboko kubuza abo babanaga amahoro, Yahumanije isezerano rye.

²² Akanwa ke kanyereraga nk'amavuta, Ariko umutima we wibwiraga intambara gusa. Amagambo ye yoroheraga kurusha amavuta ya elayo, Ariko yari inkota zikūwe.

²³ Ikoreze Uwiteka umutwaro wawe na we azakuramira, Ntabwo azakundira umukiranutsi kunyeganyezwa.

²⁴ Ariko wowe Mana, uzabamanurira mu rwobo rw'irimbukiro, Abicanyi n'abariganya ntibazacagasa iminsi yo kubaho kwabo, Ariko jyeweho nzajya nkwiringira.