Zaburi 54 - Bibiliya Yera

¹ Zaburi iyi yahimbiwe umutware w'abaririmbyi babwira inanga. Ni indirimbo ya Dawidi yahimbishijwe ubwenge.

² Yayihimbye ubwo ab'i Zifu bagendaga bakabaza Sawuli bati “Ntuzi yuko Dawidi yihishe iwacu?”

³ Mana, nkirisha izina ryawe, Uncirishirize urubanza imbaraga zawe.

⁴ Mana, umva gusenga kwanjye, Tegera ugutwi amagambo yo mu kanwa kanjye.

⁵ Kuko abanyamahanga bampagurukiye, N'abanyarugomo bashatse ubugingo bwanjye, Batashyize Imana imbere yabo. Sela.

⁶ Dore Imana ni umutabazi wanjye, Umwami ari mu ruhande rw'abaramira ubugingo bwanjye.

⁷ Azitura inabi abanzi banjye, Ubarimbure ku bw'umurava wawe.

⁸ Nzagutambira igitambo kiva mu rukundo, Uwiteka, kuko izina ryawe ari ryiza nzarishima.

⁹ Kuko Uwiteka yankijije amakuba n'ibyago byanjye byose, Ijisho ryanjye rikabona icyo rishakira abanzi banjye.