Zaburi 51 - Bibiliya Yera

¹ Zaburi iyi yahimbiwe umutware w'abaririmbyi. Ni iya Dawidi. Yayanditse

² ubwo umuhanuzi Natani yazaga aho ari, Dawidi amaze gusambana na Batisheba.

³ Mana, umbabarire ku bw'imbabazi zawe, Ku bw'imbabazi zawe nyinshi usibanganye ibicumuro byanjye.

⁴ Unyuhagire rwose gukiranirwa kwanjye, Unyeze unkureho ibyaha byanjye.

⁵ Kuko nzi ibicumuro byanjye, Ibyaha byanjye biri imbere yanjye iteka.

⁶ Ni wowe, ni wowe ubwawe nacumuyeho, Nakoze icyangwa n'amaso yawe. Byabereye bityo kugira ngo uboneke ko ukiranuka nuvuga, Kandi uboneke ko uboneye nuca urubanza.

⁷ Dore naremanywe gukiranirwa, Mu byaha ni mo mama yambyariye.

⁸ Dore ushaka ukuri ko mu mitima, Mu mutima hataboneka uzahamenyesha ubwenge.

⁹ Unyejeshe ezobu ndera, Unyuhagire ndaba umweru ndushe urubura.

¹⁰ Unyumvishe umunezero n'ibyishimo, Kugira ngo amagufwa wavunnye yishime.

¹¹ Hisha amaso yawe ibyaha byanjye, Usibanganye ibyo nakiraniwe byose.

¹² Mana, undememo umutima wera, Unsubizemo umutima ukomeye.

¹³ Ntunte kure yo mu maso yawe, Ntunkureho Umwuka wawe Wera.

¹⁴ Unsubizemo kunezezwa n'agakiza kawe, Unkomereshe umutima wemera.

¹⁵ Ni bwo nzigisha inzira yawe abacumura, Abanyabyaha baguhindukirire.

¹⁶ Mana, ni wowe Mana y'agakiza kanjye, Unkize urubanza rw'inyama y'umuntu, Ni bwo ururimi rwanjye ruzaririmba cyane gukiranuka kwawe.

¹⁷ Mwami, bumbura iminwa yanjye, Ni bwo akanwa kanjye kazerekana ishimwe ryawe.

¹⁸ Ni uko utishimira ibitambo mba mbiguhaye, Ntunezererwe ibitambo byokeje.

¹⁹ Ibitambo Imana ishima ni umutima umenetse, Umutima umenetse ushenjaguwe, Mana, ntuzawusuzugura.

²⁰ Ugirire neza i Siyoni nk'uko uhishimira, Wubake inkike z'i Yerusalemu.

²¹ Ni bwo uzishimira ibitambo by'abakiranutsi, Ni byo bitambo byokeje n'ibitwitswe, Ni bwo bazatamba amapfizi ku gicaniro cyawe.