Zaburi 50 - Bibiliya Yera

¹ Zaburi iyi ni iya Asafu. Imana y'imbaraga nyinshi, Imana Rurema, Uwiteka iravuze, Ihamagaye isi uhereye aho izuba rirasira, Ukageza aho rirengera.

² Kuri Siyoni aho ubwiza butagira inenge, Ni ho Imana irabagiraniye.

³ Imana yacu izaza ye guceceka, Imbere yayo umuriro uzakongora, Umuyaga w'ishuheri uzayigota.

⁴ Izahamagara ijuru ryo hejuru, N'isi na yo kugira ngo icire ubwoko bwayo urubanza.

⁵ Iti “Munteranirizeho abakunzi banjye, Basezeranishije nanjye isezerano ibitambo.”

⁶ Ijuru rizavuga gukiranuka kwayo, Kuko Imana ubwayo ari yo mucamanza. Sela.

⁷ “Bwoko bwanjye nimwumve nanjye ndavuga, Wa bwoko bw'Abisirayeli we, ndaguhamiriza, Ni jye Mana, Imana yawe.

⁸ Sinkugayira ibitambo byawe, Ibitambo byawe byokeje biri imbere yanjye iteka.

⁹ Sinzakura impfizi mu rugo rwawe, Cyangwa isekurume mu biraro by'ihene zawe.

¹⁰ Kuko inyamaswa zose zo mu ishyamba ari izanjye, N'inka z'ibirarashyamba zo ku misozi igihumbi.

¹¹ Nzi inyoni n'ibisiga byose byo ku misozi, Inyamaswa zo mu ishyamba ni izanjye.

¹² “Iyaba ngira inzara sinakubwira, Kuko isi n'ibiyuzuye ari ibyanjye.

¹³ Mbese aho narya inyama z'amapfizi, Cyangwa se nanywa amaraso y'ihene?

¹⁴ Utambire Imana ishimwe, Uhigure Isumbabyose umuhigo wawe.

¹⁵ Kandi unyambaze ku munsi w'amakuba no ku w'ibyago, Nzagukiza nawe uzanshimisha.”

¹⁶ Ariko umunyabyaha Imana iramubaza iti “Wiruhiriza iki kuvuga amategeko yanjye, Ugashyira isezerano ryanjye mu kanwa kawe,

¹⁷ Ubwo uri inyangaguhanwa, Ukirenza amagambo yanjye?

¹⁸ Uko ubonye umujura wishimira kubana na we, Kandi ufatana n'abasambanyi.

¹⁹ “Ushyira ibibi mu kanwa kawe, Ururimi rwawe rukarema uburiganya.

²⁰ Wicara uvuga nabi mwene so, Ubeshyera mwene nyoko.

²¹ Ibyo urabikora nkakwihorera, Ukibwira yuko mpwanye nawe rwose. Ariko nzaguhana mbishyire imbere y'amaso yawe, Uko bikurikirana.

²² “Nuko mwa bibagirwa Imana mwe, Mutekereze ibi kugira ngo ne kubashishimura, Hakabura ubakiza.

²³ Untambira ishimwe wese aba anyubahiriza, Kandi utunganya ingeso ze, Nzamwereka agakiza k'Imana.”