Zaburi 49 - Bibiliya Yera

¹ Zaburi iyi yahimbiwe umutware w'abaririmbyi. Ni iya bene Kōra.

² Mwa mahanga mwese mwe, nimwumve ibi: Mwa bari mu isi mwese mwe, nimutege amatwi.

³ Aboroheje n'abakomeye, Abatunzi hamwe n'abakene.

⁴ Akanwa kanjye kagiye kuvuga ubwenge, Umutima wanjye ugiye kwibwira ibyo kumenya.

⁵ Ndategera umugani ugutwi kwanjye, Ndahishuza inanga ijambo ryanjye riruhije.

⁶ Ni iki cyatuma ntinya mu minsi y'ibyago n'amakuba, Gukiranirwa kw'abashaka kungusha kungose?

⁷ Biringira ubutunzi bwabo, Bakirata ibintu byabo byinshi.

⁸ Ariko nta wubasha gucungura mugenzi we na hato, Cyangwa guha Imana incungu ye.

^9-10 Kugira ngo arame iteka atabona rwa rwobo, Kuko incungu y'ubugingo bwabo ari iy'igiciro cyinshi, Ikwiriye kurekwa iteka.

¹¹ Kuko abona ko abanyabwenge bapfa, Umupfapfa n'umeze nk'inka bakarimbukana, Bagasigira abandi ubutunzi bwabo.

¹² Mu mitima yabo bibwira yuko amazu yabo azagumaho iteka ryose, N'ubuturo bwabo ko buzagumaho ibihe byose, Ibikingi byaho bakabyitirira amazina yabo.

¹³ Ariko umuntu ntahorana icyubahiro, Ahwanye n'inyamaswa zipfa.

¹⁴ Iyo nzira yabo ni iy'ubupfu, Ariko ababazunguye bashima amagambo yabo. Sela.

¹⁵ Bashorererwa kujya ikuzimu nk'umukumbi w'intama, Urupfu ruzabaragira. Abatunganye bazabatwara mu gitondo, Ubwiza bwabo buzahabwa ikuzimu ngo butsembwe, Butagira aho kuba.

¹⁶ Ariko Imana izacungura ubugingo bwanjye, Ibukure mu kuboko kw'ikuzimu, Kuko izanyakira. Sela.

¹⁷ Ntubitinye umuntu natunga, Icyubahiro cy'inzu ye kikagwira,

¹⁸ Kuko napfa atazagira icyo ajyana, Icyubahiro cye ntikizamanuka ngo kimukurikire.

¹⁹ Nubwo yibwiraga akiriho ko ahiriwe, Kandi nubwo abantu bagushima witungishije,

²⁰ Ubugingo bwe buzasanga ba sekuruza, Batazareba umucyo ukundi.

²¹ Umuntu ufite icyubahiro ntagire n'ubwenge, Ahwanye n'inyamaswa zipfa.