Zaburi 47 - Bibiliya Yera

¹ Zaburi iyi yahimbiwe umutware w'abaririmbyi. Ni iya bene Kōra.

² Mwa mahanga yose mwe, nimukome mu mashyi, Muvugirize Imana impundu z'abanesheje.

³ Kuko Uwiteka Usumbabyose ateye ubwoba, Ari Umwami ukomeye utegeka isi yose.

⁴ Atugomōrera amoko tukayatwara, Ashyira amahanga munsi y'ibirenge byacu.

⁵ Adutoraniriza umwandu wacu, Ni wo byirato bya Yakobo uwo yakunze. Sela.

⁶ Imana izamukanye impundu, Uwiteka azamukanye ijwi ry'impanda.

⁷ Muririmbire Imana ishimwe, Muririmbe ishimwe, Muririmbire Umwami wacu ishimwe, Muririmbe ishimwe.

⁸ Kuko Imana ari Umwami w'isi yose, Muririmbishe ishimwe ryayo, Indirimbo ihimbishijwe ubwenge.

⁹ Imana itegeka amahanga, Imana yicaye ku ntebe yayo yera.

¹⁰ Abakomeye bo mu mahanga, Bateraniye guhinduka abantu b'Imana ya Aburahamu. Kuko ingabo zikingira abo mu isi ari iz'Imana, Ishyizwe hejuru cyane.