Zaburi 46 - Bibiliya Yera

¹ Zaburi iyi yahimbiwe umutware w'abaririmbyi. Ni iya bene Kōra babwirisha inanga ijwi rito. Ni indirimbo.

² Imana ni yo buhungiro bwacu n'imbaraga zacu, Ni umufasha utabura kuboneka mu byago no mu makuba.

³ Ni cyo gituma tutazatinya naho isi yahinduka, Naho imisozi yakurwa ahayo ikajya imuhengeri,

⁴ Naho amazi yaho yahorera akībirindura, Naho imisozi yatigiswa no kwihinduriza kwayo. Sela.

⁵ Hariho uruzi, Imigende yarwo ishimisha ururembo rw'Imana, Ni rwo Hera hari amahema y'Isumbabyose.

⁶ Imana iri hagati muri rwo ntiruzanyeganyezwa, Imana izarutabara mu museke.

⁷ Abanyamahanga barashakuje, Ibihugu by'abami byagize imidugararo, Ivuga ijwi ryayo isi irayaga.

⁸ Uwiteka Nyiringabo ari kumwe natwe, Imana ya Yakobo ni igihome kirekire kidukingira. Sela.

⁹ Nimuze murebe imirimo y'Uwiteka, Kurimbura yazanye mu isi.

¹⁰ Akuraho intambara kugeza ku mpera y'isi, Avunagura imiheto, amacumu ayacamo kabiri, Amagare ayatwikisha umuriro.

¹¹ “Nimworoshye mumenye ko ari jye Mana, Nzashyirwa hejuru mu mahanga, Nzashyirwa hejuru mu isi.”

¹² Uwiteka Nyiringabo ari kumwe natwe, Imana ya Yakobo ni igihome kirekire kidukingira. Sela.