Zaburi 45 - Bibiliya Yera

¹ Zaburi iyi yahimbiwe umutware w'abaririmbyi babwirisha inanga ijwi ryitwa “Amarebe”. Ni Zaburi ya bene Kōra yahimbishijwe ubwenge. Ni indirimbo y'urukundo.

² Umutima wanjye urabize usesekara ibyiza, Ndavuga indirimbo nahimbiye umwami, Ururimi rwanjye ni ikaramu y'uwandika vuba.

³ Uruta ubwiza abana b'abantu, Ubukundiriza busutswe ku minwa yawe, Ni cyo gitumye Imana iguha umugisha w'iteka.

⁴ Wa ntwari we, ambara inkota yawe ku itako, Ambara ubwiza bwawe n'icyubahiro cyawe.

⁵ Ugendane icyubahiro uri ku ifarashi uneshe, Urengere ukuri n'ubugwaneza no gukiranuka, Ukuboko kwawe kw'iburyo kukwigishe ibitera ubwoba.

⁶ Imyambi yawe iratyaye, Amahanga agwa hasi imbere yawe, Imyambi yawe iri mu mitima y'ababisha b'umwami.

⁷ Mana, intebe yawe ni iy'iteka ryose, Inkoni y'ubugabe bwawe ni inkoni y'utwara agororoka.

⁸ Wakunze gukiranuka wanga ibyaha, Ni cyo cyatumye Imana ari yo Mana yawe, Igusīga amavuta yo kwishima, Kukurutisha bagenzi bawe.

⁹ Imyenda yawe yose ihumura ishangi n'umusaga na kesīya, Inanga zo mu mazu yubakishijwe amahembe y'inzovu zirakwishimishije.

¹⁰ Mu bagore bawe b'icyubahiro harimo abakobwa b'abami, Iburyo bwawe hahagaze umwamikazi yambaye izahabu yavuye Ofiri.

¹¹ Umva mukobwa, utekereze utege ugutwi, Kandi wibagirwe ishyanga ryanyu n'inzu ya so.

¹² Ni cyo kizatuma umwami akunda ubwiza bwawe, Kuko ari we mwami wawe nawe umuramye.

¹³ Kandi umukobwa w'i Tiro azazana impano, Kandi abatunzi bo mu bantu bazagusaba kubahakirwa.

¹⁴ Umukobwa w'umwami uri mu kirambi afite ubwiza bwinshi, Imyenda ye iboheshejwe izahabu.

¹⁵ Ari buzanirwe umwami yambaye imyenda idaraje, Abakobwa bagenzi be bamukurikiye, Bari buzanwe aho uri.

¹⁶ Bari buzanishwe umunezero n'ibyishimo, Binjire mu nzu y'umwami.

¹⁷ Mwami, mu cyimbo cya ba sogokuruza bawe, Kizasubiramo abana bawe, Ni bo uzagira abatware mu isi yose.

¹⁸ Nzibukiriza izina ryawe ibihe byose, Ni cyo gituma amahanga azagushima iteka ryose.