Zaburi 44 - Bibiliya Yera

¹ Zaburi iyi yahimbiwe umutware w'abaririmbyi. Ni indirimbo ya bene Kōra yahimbishijwe ubwenge.

² Mana, twariyumviye n'amatwi yacu, Ba sogokuruza batubwiye imirimo wakoze mu gihe cyabo, Mu gihe cya kera.

³ Wimuje amahanga ukuboko kwawe ushingamo abo, Wateye amoko ibyago kandi abo urabatatanya mu bihugu,

⁴ Kuko atari iyabo nkota yabahaye guhindūra igihugu, Kandi atari ukuboko kwabo kwabakijije. Ahubwo ni ikiganza cyawe cy'iburyo, N'ukuboko kwawe n'umucyo wo mu maso hawe, Kuko wabīshimiraga.

⁵ Mana, ni wowe Mwami wanjye, Tegekera Abayakobo agakiza.

⁶ Ni wowe uzaduha gutsinda ababisha bacu, Izina ryawe ni ryo rizaduha kuribata abaduhagurukiye.

⁷ Kuko ntaziringira umuheto wanjye, Kandi inkota yanjye atari yo izankiza,

⁸ Ahubwo ni wowe wadukijije ababisha bacu, Wakojeje isoni abatwanga.

⁹ Imana ni yo twirata umunsi ukira, Kandi tuzashima izina ryawe iteka ryose. Sela.

¹⁰ Ariko none wadutaye kure waduteje igisuzuguriro, Kandi ntutabarana n'ingabo zacu.

¹¹ Watumye ababisha bacu badukubita incuro, Abatwanga baratwinyagira.

¹² Wadutanze nk'intama zarobanuriwe kubagwa, Wadutatanirije mu mahanga.

¹³ Utangira ubusa abantu bawe, Kandi igiciro cyabo ntucyongeresha ubutunzi bwawe.

¹⁴ Utugira igitutsi cy'abaturanyi bacu, Ibitwenge no gukobwa by'abatugose.

¹⁵ Watugize iciro ry'imigani mu mahanga, Abazungurizwa imitwe n'amoko.

¹⁶ Igisuzuguriro cyanjye kiri imbere yanjye umunsi ukira, Isoni zo mu maso hanjye zirantwikiriye,

¹⁷ Ku bw'ijwi ry'utongana agatukana, Ku bw'umwanzi n'uhōra inzigo.

¹⁸ Ibyo byose byadusohoyeho ariko ntitwakwibagiwe, Kandi ntitwavuye mu isezerano ryawe.

¹⁹ Umutima wacu ntiwasubiye inyuma, Intambwe zacu ntiziyobagije ngo zive mu nzira yawe,

²⁰ Bitume utuvunagurira ahantu h'ingunzu, Udutwikirize igicucu cy'urupfu.

²¹ Niba twaribagiwe izina ry'Imana yacu, Niba twararamburiye amaboko indi mana,

²² Imana ntizabirondōra, Kuko izi ibihishwe mu mutima?

²³ Ahubwo twiricwa umunsi ukira bakuduhōra, Twahwanijwe n'intama z'imbagwa.

²⁴ Mwami, ivurugute, Ni iki kigushinjirije? Kanguka ntudute kuri iteka ryose.

²⁵ Ni iki gituma utwikīra mu maso hawe, Ukibagirwa umubabaro wacu n'agahato baduhata?

²⁶ Kuko ubugingo bwacu bwunamishijwe bukagera mu mukungugu, Inda yacu yarumanye n'ubutaka.

²⁷ Haguruka udutabare, Uducungure ku bw'imbabazi zawe.