Zaburi 41 - Bibiliya Yera

¹ Zaburi iyi yahimbiwe umutware w'abaririmbyi Ni iya Dawidi.

² Hahirwa uwita ku bakene, Uwiteka azamukiza ku munsi w'ibyago.

³ Uwiteka azamurinda amukize, kandi azahirwa ari mu isi, Kandi ntumuhe abanzi be kumugirira uko bashaka.

⁴ Uwiteka azamwiyegamiza ahondobereye ku buriri, Ni wowe umubyukiriza uburiri iyo arwaye.

⁵ Naravuze nti “Uwiteka umbabarire, Ukize ubugingo bwanjye kuko nagucumuyeho.”

⁶ Abanzi banjye banyifuriza nabi bati “Azapfa ryari ngo izina rye ryibagirane?”

⁷ Kandi umwe muri abo iyo aje kunsura aba anshunga, Umutima we ukiyuzuriza inama mbi, Agasohoka akabivuga.

⁸ Abanyanga bose bamvugira mu byongorerano, Bangira inama zo kungirira nabi.

⁹ Bati “Indwara ikomeye imubayeho akaramata, Noneho ubwo aryamye ntazabyuka ukundi.”

¹⁰ Kandi incuti yanjye y'amagara nizeraga nagaburiraga, Ni yo imbanguriye umugeri.

¹¹ Ariko wowe ho Uwiteka umbabarire umbyutse, Kugira ngo mbiture.

¹² Iki ni cyo kimenyesha yuko unyishimira, Ni uko umwanzi wanjye atavugiriza impundu kunesha.

¹³ Kandi jyeweho unkomereza gukiranuka kwanjye, Kandi unshyira imbere yawe iteka ryose.

¹⁴ Uwiteka Imana y'Abisirayeli ahimbazwe, Uhereye kera kose ukageza iteka ryose. Amen kandi Amen.