Zaburi 38 - Bibiliya Yera

¹ Zaburi iyi ni iya Dawidi, yahimbiwe kuba urwibutso.

² Uwiteka ntumpanishe umujinya wawe, Kandi ntumpanishe uburakari bwawe bwotsa.

³ Kuko imyambi yawe impamye, Ukuboko kwawe kukanshikamira.

⁴ Nta hazima mu mubiri wanjye ku bw'umujinya wawe, Nta mahoro amagufwa yanjye afite ku bw'ibyaha byanjye.

⁵ Kuko ibyo nakiraniwe bindengeye, Bihwanye n'umutwaro uremereye unanira.

⁶ Inguma zanjye ziranuka kandi ziraboze, Ku bw'ubupfu bwanjye.

⁷ Ndahetamye nunamye cyane, Ngenda nambaye ibyo kwirabura umunsi ukira.

⁸ Kuko ikiyunguyungu cyanjye cyuzuye umuriro, Kandi nta hazima mu mubiri wanjye.

⁹ Ndahondobereye ndavunaguritse, Nanihishijwe no guhagarika umutima.

¹⁰ Mwami, ibyo nshaka byose biri imbere yawe, Kuniha kwanjye ntuguhishwa.

¹¹ Umutima urankubita, Intege zanjye zirashira, Amaso yanjye na yo ubwayo afite ibihuzenge.

¹² Abakunzi banjye n'incuti zanjye, bampaye akato ku bw'icyago cyanjye, Bene wacu bampagaze kure.

¹³ Kandi abashaka kunyica bantega imitego, Abanshakira ibyago bavuga iby'ubwicanyi, Bagatekereza uburiganya umunsi ukira.

¹⁴ Ariko jyeweho meze nk'igipfamatwi sinumva, Meze nk'ikiragi kitabumbura umunwa.

¹⁵ Ni ukuri meze nk'umuntu utumva, Udafite mu kanwa ibyo asubiza undi.

¹⁶ Kuko Uwiteka ari wowe niringiye, Mwami Imana yanjye ni wowe uzansubiza.

¹⁷ Kuko navuze nti “Be kunyishima hejuru, Iyo ikirenge cyanjye kinyereye banyirata hejuru.”

¹⁸ Kuko ndi bugufi bwo gucumbagira, Kandi umubabaro wanjye uri imbere yanjye iteka.

¹⁹ Kuko nzatura gukiranirwa kwanjye, Nzagira agahinda k'ibyaha byanjye.

²⁰ Ariko abanzi banjye ni abanyantege nyinshi, Kandi ni abanyamaboko, Abanyangira impamvu z'ibinyoma baragwiriye.

²¹ Abitura inabi ababagiriye neza, Na bo ni abanzi banjye kuko nkurikiza icyiza.

²² Uwiteka ntundeke, Mana yanjye ntumbe kure.

²³ Mwami gakiza kanjye, Tebuka untabare.