Zaburi 35 - Bibiliya Yera

¹ Zaburi ya Dawidi. Uwiteka burana n'abamburanya, Rwana n'abandwanya.

² Enda ingabo nto n'inini, Uhagurukire kuntabara.

³ Kandi ushingure icumu mu ntagara wimire abangenza, Ubwire umutima wanjye uti “Ni jye gakiza kawe.”

⁴ Abashaka ubugingo bwanjye bamware bagire igisuzuguriro Abajya inama yo kungirira nabi basubizwe inyuma, Baterwe ipfunwe.

⁵ Babe nk'umurama utumurwa n'umuyaga Kandi marayika w'Uwiteka abirukane.

⁶ Inzira yabo ibe umwijima n'ubunyereri, Kandi marayika w'Uwiteka abagenze.

⁷ Kuko bantegeye ikigoyi ku bushya badafite impamvu, Kandi badafite impamvu bateze ubugingo bwanjye ubushya.

⁸ Kurimbuka kumutungure, Ikigoyi yateze abe ari we gifata ubwe, Akigwemo arimbuke.

⁹ Ni bwo umutima wanjye uzishimira Uwiteka, Uzishimira agakiza ke.

¹⁰ Amagufwa yanjye yose azavuga ati “Uwiteka ni nde uhwanye nawe? Kuko ukiza umunyamubabaro umurusha amaboko, Ukiza umunyamubabaro n'umukene ubanyaga.”

¹¹ Abagabo b'ibinyoma barahaguruka, Bakandega ibyo ntazi bakabimbaza.

¹² Ibyiza nabagiriye bakabyitura ibibi, Bikampindura nk'impfusha.

¹³ Ariko jyeweho iyo barwaraga nambaraga ibigunira, Nkababarisha ubugingo bwanjye kwiyiriza ubusa, Ngasenga ncuritse umutwe mu gituza.

¹⁴ Nkamera nk'aho ari incuti yanjye, cyangwa mwene data urwaye, Nkiyunamira nkambara ibyo kwirabura nk'uborogera nyina.

¹⁵ Ariko ncumbagiye barishima baraterana, Abatagira umumaro banteraniraho sinabimenya, Baranshishimura ntibarorera.

¹⁶ Bampekenyera amenyo nk'uko abakobanyi bakora, Bakobana ibiteye isoni aho abantu basangira.

¹⁷ Mwami, uzageza he kundebēra gusa? Kiza ubugingo bwanjye kurimbura kwabo, Icyo mfite rukumbi gikize intare.

¹⁸ Nzagushimira mu iteraniro ryinshi, Nzaguhimbariza mu bantu benshi.

¹⁹ Abanyangira impamvu z'ibinyoma be kunyishima hejuru, Abanyangira ubusa be kunyiciranira amaso.

²⁰ Kuko batavuga iby'amahoro, Ahubwo bajya inama yo gushaka ibyo babeshyera abatuza bo mu gihugu.

²¹ Banyasamiye cyane, Baravuga bati “Ahaa, ahaa, amaso yacu arabibonye.”

²² Uwiteka, warabibonye ntuceceke, Mwami ntumbe kure.

²³ Ivurugute ukangukire kuncira urubanza, Urubanza rw'ibyanjye Mana yanjye, Mwami wanjye.

²⁴ Uwiteka Mana yanjye, Uncire urubanza rukwiriye gukiranuka kwawe, Be kunyishima hejuru.

²⁵ Be kwibwira bati “Ahaa, ni cyo twashakaga.” Be kuvuga bati “Tumumire bunguri.”

²⁶ Abishimira ibyago byanjye bakorwe n'isoni bamwarane, Abanyirata hejuru bambikwe isoni n'igisuzuguriro.

²⁷ Abakunda ko ntsinda nk'uko bikwiriye nibavuze impundu bishime, Iteka bavuge bati “Uwiteka ahimbazwe”, Wishimire amahoro y'umugaragu we.

²⁸ Kandi ururimi rwanjye ruzavuga gukiranuka kwawe, Ruzavuga ishimwe ryawe umunsi wire.