Zaburi 33 - Bibiliya Yera

¹ Mwa bakiranutsi mwe, Mwishimire Uwiteka, Gushima gukwiriye abatunganye.

² Mushimishe Uwiteka inanga, Mumuririmbirire ishimwe kuri nebelu y'imirya cumi.

³ Mumuririmbire indirimbo nshya, Mucurangishe inanga ubwenge, Muyivugishe ijwi rirenga.

⁴ Kuko ijambo ry'Uwiteka ritunganye, Imirimo ye yose ayikorana umurava.

⁵ Akunda gukiranuka n'imanza zitabera, Isi yuzuye imbabazi z'Uwiteka.

⁶ Ijambo ry'Uwiteka ni ryo ryaremye ijuru, Umwuka wo mu kanwa ke ni wo waremye ingabo zo muri ryo zose.

⁷ Ateranya amazi yo mu nyanja nk'ikirundo, Ashyingura imuhengeri mu bubiko.

⁸ Isi yose yubahe Uwiteka, Abari mu isi bose bamutinye.

⁹ Kuko yavuze bikaba, Yategetse bigakomera.

¹⁰ Uwiteka ahindura ubusa imigambi y'amahanga, Akuraho ibyo amoko yibwira.

¹¹ Imigambi y'Uwiteka ikomera iteka ryose, Ibyo yibwira mu mutima we bihoraho ibihe byose.

¹² Hahirwa ishyanga rifite Uwiteka ho Imana yaryo, Ubwoko yitoranirije kuba umwandu we.

¹³ Uwiteka arebera mu ijuru, Areba abana b'abantu bose.

¹⁴ Ari mu buturo bwe, Areba ababa mu isi bose.

¹⁵ Ni we ubumba imitima yabo bose, Akitegereza imirimo yabo yose.

¹⁶ Nta mwami ukizwa n'uko ingabo ze ari nyinshi, Intwari ntikizwa n'imbaraga zayo nyinshi.

¹⁷ Ifarashi nta mumaro igira wo gukiza, Ntizakirisha umuntu imbaraga zayo nyinshi.

¹⁸ Dore ijisho ry'Uwiteka riri ku bamwubaha, Riri ku bategereza imbabazi ze,

¹⁹ Ngo akize ubugingo bwabo urupfu, Abarinde mu nzara badapfa.

²⁰ Imitima yacu itegereza Uwiteka, Ni we mutabazi wacu n'ingabo idukingira.

²¹ Imitima yacu izamwishimira, Kuko twiringiye izina rye ryera.

²² Uwiteka, imbabazi zawe zibe kuri twe Nk'uko tugutegereza.