Zaburi 30 - Bibiliya Yera

¹ Zaburi iyi ni Indirimbo yaririmbwe ubwo bezaga Inzu. Ni Zaburi ya Dawidi.

² Uwiteka ndaguhimbariza kuko wampagurukije, Ntukunde ko abanzi banjye banyishima hejuru.

³ Uwiteka Mana yanjye, Naragutakiye urankiza.

⁴ Uwiteka wazamuye ubugingo bwanjye ubukura ikuzimu, Wankijije urupfu ngo ne kumanuka nkajya muri rwa rwobo.

⁵ Muririmbire Uwiteka ishimwe mwa bakunzi be mwe, Mushime izina rye ryera.

⁶ Kuko uburakari bwe ari ubw'akanya gato, Ariko urukundo rwe ruzana ubugingo. Ahari kurira kwararira umuntu nijoro, Ariko mu gitondo impundu zikavuga.

⁷ Nanjye ubwo nagubwaga neza naravuze nti “Ntabwo nzanyeganyezwa.”

⁸ Uwiteka ku bw'urukundo rwawe, wari ukomeje umusozi wanjye, Wampishe mu maso hawe mpagarika umutima.

⁹ Uwiteka naragutakiye, Kandi ninginze Uwiteka

¹⁰ Nti “Amaraso yanjye azamara iki nimanuka nkajya muri rwa rwobo? Mbese umukungugu uzaguhimbaza? Uzātura umurava wawe?

¹¹ Uwiteka nyumva umbabarire, Uwiteka mbera umutabazi.”

¹² Uhinduye umuborogo wanjye imbyino, Unkenyuruye ibigunira byanjye, unkenyeza ibyishimo,

¹³ Kugira ngo ubwiza bwanjye bukuririmbire ishimwe budaceceka. Uwiteka Mana yanjye, nzagushima iteka ryose.