Zaburi 3 - Bibiliya Yera

¹ Zaburi ya Dawidi, yahimbye ubwo yahungaga Abusalomu umwana we.

² Uwiteka, erega abanzi banjye baragwiriye! Abangomeye ni benshi.

³ Benshi baramvuga bati “Nta gakiza afite ku Mana.” Sela.

⁴ Ariko wowe Uwiteka, uri ingabo inkingira, Uri icyubahiro cyanjye, ni wowe ushyira hejuru umutwe wanjye.

⁵ Ijwi ryanjye ritakira Uwiteka, Na we akansubiza ari ku musozi we wera. Sela.

⁶ Nararyamaga ngasinzira, Ngakanguka kuko Uwiteka ari we ujya andamira.

⁷ Sinzatinya abantu inzovu nyinshi, Bangoteye impande zose kugira ngo bantere.

⁸ Uwiteka haguruka, Mana yanjye nkiza, Kuko wakubise abanzi banjye bose ku gisendabageni, Waciye amenyo y'abanyabyaha.

⁹ Agakiza kabonerwa mu Uwiteka, Umugisha utanga ube ku bantu bawe. Sela.