Zaburi 25 - Bibiliya Yera

¹ Zaburi ya Dawidi. Uwiteka ni wowe ncururira umutima,

² Mana yanjye ni wowe niringiye, Ne gukorwa n'isoni, Abanzi banjye be kunyishima hejuru.

³ Si ko bizaba, Mu bagutegereza nta wuzakorwa n'isoni. Abava mu isezerano ari nta mpamvu, Ni bo bazakorwa n'isoni.

⁴ Uwiteka nyereka inzira zawe, Unyigishe imigenzereze yawe.

⁵ Unyobore ku bw'umurava wawe unyigishe, Kuko ari wowe Mana y'agakiza kanjye, Ni wowe ntegereza umunsi ukira.

⁶ Uwiteka, ibuka imbabazi zawe no kugira neza kwawe, Kuko byahozeho kera kose.

⁷ Ntiwibuke ibyaha byo mu busore bwanjye cyangwa ibicumuro byanjye, Nk'uko imbabazi zawe ziri abe ari ko unyibuka, Ku bwo kugira neza kwawe Uwiteka.

⁸ Uwiteka ni mwiza aratunganye, Ni cyo gituma azigisha abanyabyaha inzira.

⁹ Abicisha bugufi azabayobora mu byo gukiranuka, Abicisha bugufi azabigisha inzira ye.

¹⁰ Inzira zose z'Uwiteka ni imbabazi n'umurava, Ku bitondera isezerano rye n'ibyo yahamije.

¹¹ Uwiteka ku bw'izina ryawe, Mbabarira gukiranirwa kwanjye kurakomeye.

¹² Ni nde wubaha Uwiteka? Azamwigisha inzira akwiriye guhitamo.

¹³ Umutima we uzaba mu mahoro, Urubyaro rwe ruzaragwa isi.

¹⁴ Ibihishwe by'Uwiteka bihishurirwe abamwubaha, Azabereke isezerano rye.

¹⁵ Amaso yanjye ahora yerekeye ku Uwiteka, Kuko azakura ibirenge byanjye mu kigoyi.

¹⁶ Unkebuke umbabarire, Kuko ntagira shinge na rugero nkababara.

¹⁷ Imibabaro y'umutima wanjye uyoroshye, Nuko unkure mu makuba yanjye no mu byago byanjye.

¹⁸ Reba umubabaro wanjye n'imiruho, Unkureho ibyaha byanjye byose.

¹⁹ Reba abanzi banjye ni benshi, Kandi banyanga urwango rw'inkazi.

²⁰ Rinda umutima wanjye unkize, Ne gukorwa n'isoni kuko nguhungiyeho.

²¹ Gukiranuka no gutungana binkize, Kuko ngutegereza.

²² Mana cungura Abisirayeli, Ubakure mu makuba yabo yose no mu byago byabo byose.