Zaburi 22 - Bibiliya Yera

¹ Zaburi iyi yahimbiwe umutware w'abaririmbyi babwirisha inanga ijwi ryitwa “Imparakazi yo mu gitondo.” Ni Zaburi ya Dawidi.

² Mana yanjye, Mana yanjye, Ni iki kikundekesheje, Ukaba kure ntuntabare, Kure y'amagambo yo kuniha kwanjye?

³ Mana yanjye ntakira ku manywa ntunsubize, Ntakira na nijoro simpore.

⁴ Ariko uri uwera, Intebe yawe igoswe n'ishimwe ry'Abisirayeli.

⁵ Ba sogokuruza barakwiringiraga, Barakwiringiraga nawe ukabakiza.

⁶ Baragutakiraga bagakizwa, Barakwiringiraga ntibakorwe n'isoni.

⁷ Ariko jyeweho ndi umunyorogoto sindi umuntu, Ndi ruvumwa mu bantu nsuzugurwa na bose.

⁸ Abandeba bose baranseka bakanshinyagurira, Barampema bakanzunguriza imitwe bati

⁹ “Bishyire ku Uwiteka amukize, Abimukuremo kuko amwishimira.”

¹⁰ Ariko ni wowe wamvukishije, Wanyiringirishaga nkiri ku ibere rya mama.

¹¹ Ni wowe naragijwe uhereye mu ivuka ryanjye, Uri Imana yanjye uhereye igihe naviriye mu nda ya mama.

¹² Ntumbe kure kuko amakuba ari bugufi, Kandi ari nta mutabazi.

¹³ Amapfizi menshi arangose, Amapfizi y'i Bashani y'amanyambaraga aranzengutse.

¹⁴ Baranyasamiye n'akanwa kabo, Nk'intare itanyagura yivuga.

¹⁵ Nsutswe nk'amazi, Amagufwa yanjye yose arakutse. Umutima wanjye umeze nk'ibimamara, Uyagiye mu mara yanjye.

¹⁶ Intege zanjye zumye nk'urujyo, Ururimi rwanjye rufatanye n'uruhekenyero. Kandi unshyize mu mukungugu w'urupfu,

¹⁷ Kuko imbwa zingose, Umutwe w'abanyabyaha untaye hagati, Bantoboye ibiganza n'ibirenge.

¹⁸ Mbasha kubara amagufwa yanjye yose, Bandeba bankanuriye amaso.

¹⁹ Bagabana imyenda yanjye, Bafindira umwambaro wanjye.

²⁰ Ariko Uwiteka ntumbe kure, Ni wowe muvunyi wanjye tebuka untabare.

²¹ Kiza ubugingo bwanjye inkota, Icyo mfite rukumbi ugikize ubutware bw'imbwa.

²² Nkiza akanwa k'intare, Waranshubije unkura mu mahembe y'imbogo.

²³ Nzabwira bene Data izina ryawe, Nzagushimira hagati y'iteraniro.

²⁴ Abubaha Uwiteka mumushime, Mwa rubyaro rwa Yakobo rwose mwe, mumuhimbaze, Mwa rubyaro rwa Isirayeli rwose mwe, mumutinye,

²⁵ Kuko atasuzuguye umubabaro w'ubabazwa, Habe no kuwuzinukwa, Kandi ntamuhishe mu maso he, Ahubwo yaramutakiye aramwumvira.

²⁶ Kuri wowe ni ho gushima kwanjye guturuka, Ngushimira mu iteraniro ryinshi, Nzaguhigurira umuhigo wanjye mu maso y'abakubaha.

²⁷ Abanyamubabaro bazarya bahage, Abashaka Uwiteka bazamushima, Imitima yanyu irame iteka ryose.

²⁸ Abo ku mpera yose y'isi bazibuka bahindukirire Uwiteka, Amoko yose yo mu mahanga azasengera imbere yawe.

²⁹ Kuko ubwami ari ubw'Uwiteka, Kandi ari we mutegetsi w'amahanga.

³⁰ Abakomeye bo mu isi bose bazarya baramye, Kandi abamanuka bajya mu mukungugu bazunama imbere ye, Umuntu wese utabasha gukiza ubugingo bwe gupfa.

³¹ Abuzukuruza bazamukorera, Ubuvivi buzabaho buzabwirwa iby'Umwami Imana.

³² Bazaza babwire abantu bazavuka, Gukiranuka kwe ko ari we wabikoze.