Zaburi 21 - Bibiliya Yera

¹ Zaburi iyi yahimbiwe umutware w'abaririmbyi. Ni iya Dawidi.

² Uwiteka umwami azishimira imbaraga zawe, Erega agakiza kawe azakanezererwa cyane!

³ Wamuhaye icyo umutima we ushaka, Ntiwamwimye icyo iminwa ye yasabye. Sela.

⁴ Kuko umusanganije imigisha y'ibyiza, Wamwambitse ikamba ry'izahabu nziza.

⁵ Yagusabye ubugingo urabumuha, Umuha kurama iteka ryose.

⁶ Igitinyiro cye ni cyinshi ku bw'agakiza kawe, Icyubahiro no gukomera ubimushyizeho.

⁷ Umugize icyitegererezo cy'ihirwe iteka ryose, Umwishimishije ibyishimo mu maso yawe.

⁸ Kuko umwami yiringira Uwiteka, Ku bw'imbabazi z'Usumba byose ntazanyeganyezwa.

⁹ Ukuboko kwawe kuzashyikira ababisha bawe bose, Ukuboko kwawe kw'iburyo kuzashyikira abakwanga bose.

¹⁰ Uzabahindura nk'ikōme ryaka mu gihe cy'umujinya wawe, Uwiteka azabamirisha umujinya we, Umuriro uzarabya.

¹¹ Nawe uzatsemba imbuto zabo mu isi, Urubyaro rwabo uzarutsemba mu bana b'abantu.

¹² Kuko bagambiriye kukugirira nabi, Bagiye inama batabasha gusohoza.

¹³ Uzatuma baguha ibitugu, Uzatamika imyambi mu ruge rw'umuheto wawe mu maso yabo.

¹⁴ Uwiteka wishyirishe hejuru imbaraga zawe, Uko ni ko tuzaririmba dushima ubutware bwawe.