Zaburi 20 - Bibiliya Yera

¹ Zaburi iyi yahimbiwe umutware w'abaririmbyi. Ni iya Dawidi.

² Uwiteka akumvire ku munsi w'amakuba no ku w'ibyago, Izina ry'Imana ya Yakobo rigushyire hejuru.

³ Ikoherereze gutabarwa kuva ahera h'urusengero, Iguhe imbaraga ziva i Siyoni.

⁴ Yibuke amaturo yawe yose, Yemere igitambo cyawe cyokeje. Sela.

⁵ Iguhe icyo umutima wawe ushaka, Isohoze inama zawe zose.

⁶ Tuzaririmbishwa impundu n'agakiza kawe, Kandi ku bw'izina ry'Imana yacu tuzerekana amabendera yacu, Uwiteka asohoze ibyo usaba byose.

⁷ None menye yuko Uwiteka akiza uwo yasize, Azamusubiza ari mu ijuru rye ryera, Azamushubirisha imbaraga zikiza z'ukuboko kwe kw'iburyo.

⁸ Bamwe biringira amagare, Abandi biringira amafarashi, Ariko twebweho tuzavuga izina ry'Uwiteka Imana yacu.

⁹ Barunamye baragwa, Ariko twebweho turahagurutse turema.

¹⁰ Uwiteka kiza umwami, Kandi udusubize uko tukwambaje.