Zaburi 19 - Bibiliya Yera

¹ Zaburi iyi yahimbiwe umutware w'abaririmbyi. Ni iya Dawidi.

² Ijuru rivuga icyubahiro cy'Imana, Isanzure ryerekana imirimo y'intoki zayo.

³ Amanywa abwira andi manywa ibyayo, Ijoro ribimenyesha irindi joro.

⁴ Nta magambo cyangwa ururimi biriho, Nta wumva ijwi ryabyo.

⁵ Umugozi ugera wabyo wakwiriye isi yose, Amagambo yabyo yageze ku mpera y'isi. Muri ibyo yabambiye izuba ihema,

⁶ Rimeze nk'umukwe usohoka mu nzu ye, Ryishima nk'umunyambaraga rinyura mu nzira yaryo.

⁷ Riva ku mpera y'ijuru, Rikagera ku yindi mpera yaryo, Nta kintu gihishwa icyokere cyaryo.

⁸ Amategeko y'Uwiteka atungana rwose asubiza intege mu bugingo, Ibyo Uwiteka yahamije ni ibyo kwizerwa biha umuswa ubwenge,

⁹ Amategeko Uwiteka yigishije araboneye anezeza umutima, Ibyo Uwiteka yategetse ntibyanduye bihwejesha amaso.

¹⁰ Kubaha Uwiteka ni kwiza guhoraho iteka ryose, Amateka y'Uwiteka ni ay'ukuri, Ni ayo gukiranuka rwose.

¹¹ Bikwiriye kwifuzwa kuruta izahabu, Naho yaba izahabu nziza nyinshi, Biryoherera kuruta ubuki n'umushongi w'ibinyagu utonyanga.

¹² Kandi ni byo bihana umugaragu wawe, Kubyitondera harimo ingororano ikomeye.

¹³ Ni nde ubasha kwitegereza kujijwa kwe? Ntumbareho ibyaha byanyihishe,

¹⁴ Kandi ujye urinda umugaragu wawe gukora ibyaha by'ibyitumano, Bye kuntwara uko ni ko nzatungana rwose, Urubanza rw'igicumuro gikomeye ntiruzantsinda.

¹⁵ Amagambo yo mu kanwa kanjye, N'ibyo umutima wanjye wibwira bishimwe mu maso yawe, Uwiteka gitare cyanjye, mucunguzi wanjye.