Zaburi 18 - Bibiliya Yera

¹ Zaburi iyi yahimbiwe umutware w'abaririmbyi. Ni iya Dawidi, umugaragu w'Uwiteka, wabwiye Uwiteka amagambo y'iyi ndirimbo ku munsi Uwiteka yamukirije amaboko y'abanzi be n'aya Sawuli ati

² Ndagukunda ni wowe mbaraga zanjye.

³ Uwiteka ni igitare cyanjye n'igihome cyanjye kinkingira n'umukiza wanjye, Ni Imana yanjye n'urutare rwanjye rukomeye, Ni we nzahungiraho, Ni we ngabo inkingira n'ihembe ry'agakiza kanjye, Ni igihome cyanjye kirekire.

⁴ Nzajya nambaza Uwiteka ukwiriye gushimwa, Ni bwo nzakizwa abanzi banjye.

⁵ Ingoyi z'urupfu zarangose, Imyuzure yo kurimbuka yanteye ubwoba.

⁶ Ingoyi z'ikuzimu zantaye hagati, Ibigoyi by'urupfu byantanze imbere.

⁷ Mu mubabaro wanjye nambaje Uwiteka, Natakiye Imana yanjye, Yumvira ijwi ryanjye mu rusengero rwayo, Ibyo natakiye imbere yayo biyinjira mu matwi.

⁸ Maze isi iratigita ihinda umushyitsi, Imfatiro z'imisozi na zo ziranyeganyega, Zitigiswa n'uburakari bwayo.

⁹ Umwotsi ucumba mu mazuru yayo, Umuriro uva mu kanwa kayo uratwika, Havamo n'amakara yaka.

¹⁰ Imanura ijuru iramanuka, Umwijima w'icuraburindi wari munsi y'ibirenge byayo.

¹¹ Iguruka ihetswe na kerubi, Igurukishwa vuba n'amababa y'umuyaga.

¹² Umwijima iwugira ubwihisho kuba ihema ryayo riyigose, Umwijima w'ibiremeshwa amazi, Ibicu bikomeye byo mu ijuru.

¹³ Ubwiza burabagirana buri imbere yayo butuma ibicu byayo bikomeye bigenda, Hakagwa urubura n'amakara yaka.

¹⁴ Kandi Uwiteka ahindishiriza inkuba mu ijuru, Usumbabyose avuga ijwi rye, Hagwa urubura n'amakara yaka.

¹⁵ Arasa imyambi ye atātānya abanzi banjye, Ni yo mirabyo myinshi arabirukana.

¹⁶ Maze ubutaka bwo hasi y'amazi buraboneka, Imfatiro z'isi ziratwikururwa, Ku bwo guhana kwawe Uwiteka, Ku bw'inkubi y'umwuka uva mu mazuru yawe.

¹⁷ Ari mu ijuru arambura ukuboko aramfata, Ankura mu mazi y'isanzure.

¹⁸ Ankiza umwanzi wanjye ukomeye, N'abanyangaga kuko bandushaga amaboko.

¹⁹ Bari bantanze imbere ku munsi w'amakuba yanjye, Ariko Uwiteka ni we wambereye ubwishingikirizo.

²⁰ Abinkuramo anshyira ahantu hagari, Yankirije kuko yanyishimiraga.

²¹ Uwiteka yangororeye ibikwiriye gukiranuka kwanjye, Nk'uko amaboko yanjye atanduye ni ko yangiriye.

²² Kuko nitondeye inzira z'Uwiteka, Kandi ntakoze icyaha cyo kureka Imana yanjye.

²³ Kuko amateka yayo yose yari imbere yanjye, Kandi amategeko yayo ntayakuye imbere yanjye.

²⁴ Kandi nabanaga na yo ntungana, Nirinze gukiranirwa kwanjye.

²⁵ Ni cyo cyatumye Uwiteka anyitura ibikwiriye gukiranuka kwanjye, Ibikwiriye kutandura kw'amaboko yanjye mu maso ye.

²⁶ Ku munyambabazi uziyerekana nk'umunyambabazi, Ku utunganye uziyerekana nk'utunganye.

²⁷ Ku utanduye uziyerekana nk'utanduye, Ku kigoryi uziyerekana nk'ugoramye.

²⁸ Kuko uzakiza abacishijwe bugufi, Ariko amaso yibona uzayasubiza hasi.

²⁹ Ni wowe ukongeza itabaza ryanjye, Uwiteka Imana yanjye ni we umurikira umwijima wanjye.

³⁰ Kuko ari wowe umpa gutera umutwe w'ababisha, Kandi ari Imana yanjye impa gusimbuka inkike z'igihome.

³¹ Inzira y'Imana itungana rwose, Ijambo ry'Uwiteka ryaravugutiwe, Ni ingabo ikingira abamuhungiraho bose.

³² Ni nde Mana itari Uwiteka? Ni nde Gitare kitari Imana yacu?

³³ Ni yo Mana inkenyeje imbaraga, Igatunganya inzira yanjye.

³⁴ Ni yo ihindura ibirenge byanjye nk'iby'imparakazi, Impagarika ku misozi yanjye.

³⁵ Yigisha amaboko yanjye kurasana, Bituma amaboko yanjye afora umuheto w'umuringa.

³⁶ Kandi wampaye ingabo inkingira ari yo gakiza kawe, Ukuboko kwawe kw'iburyo kurandamira, Ubugwaneza bwawe bwanteye ikuzo.

³⁷ Intambwe zanjye wazaguriye inzira, Ibirenge byanjye ntibyanyereye.

³⁸ Nirukanye ababisha banjye mbageraho, Sinagaruka batarimbutse.

³⁹ Narabamenaguye, ntibabasha kubyuka, Kandi baguye munsi y'ibirenge byanjye.

⁴⁰ Kuko wankenyereje imbaraga kurwana, Abampagurukiye bakantera warabangomoreye.

⁴¹ Watumye ababisha banjye bampa ibitugu, Kugira ngo ndimbure abanyanga.

⁴² Baratakambye ntihagira ubakiza, Batakiye Uwiteka ntiyabasubiza,

⁴³ Maze mbasya nk'umukungugu utumurwa n'umuyaga, Mbaribata nk'ibyondo byo mu nzira.

⁴⁴ Wankijije imirwano y'abantu, Wangize umutware w'amahanga, Ishyanga ntigeze kumenya ryarankoreye.

⁴⁵ Bumvise inkuru yanjye uwo mwanya baranyoboka, Abanyamahanga barangomokeye baranshyeshya.

⁴⁶ Abanyamahanga babaye imihonge, Bava mu bihome byabo bahinda imishyitsi.

⁴⁷ Uwiteka ahoraho, Igitare cyanjye gihimbazwe, Imana y'agakiza kanjye ishyirwe hejuru.

⁴⁸ Ni yo Mana impōrera, Ikangomorera amahanga nkayatwara.

⁴⁹ Inkiza ababisha banjye, Ni koko unshyira hejuru y'abampagurukira, Unkiza umunyarugomo.

⁵⁰ Ni cyo gituma Uwiteka nzagushima mu mahanga, Ndirimba ishimwe ry'izina ryawe.

⁵¹ Aha umwami yimitse agakiza gakomeye, Agirira imbabazi uwo yasize, Ni Dawidi n'urubyaro rwe iteka ryose.