Zaburi 17 - Bibiliya Yera

¹ Gusenga kwa Dawidi. Uwiteka, umva iby'ukuri byanjye, Tyariza ugutwi gutaka kwanjye, Tegera ugutwi gusenga kwanjye, Kudaturuka mu minwa iryarya.

² Urubanza rwanjye ruturuke imbere yawe, Amaso yawe arebe ibitunganye.

³ Wagerageje umutima wanjye, wangendereye nijoro. Warantase ntiwambonana umugambi mubi, Namaramaje kudacumuza ururimi rwanjye.

⁴ Ku by'imirimo y'abantu, kwitondera ijambo ry'iminwa yawe, Ni ko kumpa kwirinda inzira z'abanyarugomo.

⁵ Intambwe zanjye zikomerera mu nzira zawe, Ibirenge byanjye ntibinyerera.

⁶ Mana, ndakwambaje kuko uri bunsubize, Ntegera ugutwi wumve ibyo mvuga.

⁷ Erekana imbabazi zawe zitangaza, Wowe ukiza abakwiringira, Ababahagurukira ubakirishe ukuboko kwawe kw'iburyo.

⁸ Undinde nk'imboni y'ijisho, Umpishe mu gicucu cy'amababa yawe.

⁹ Umpishe abanyabyaha banyaga, Ni bo banzi banjye bashaka kunyica bangose.

¹⁰ Bakinze imitima yabo, Akanwa kabo bakavugisha iby'ubwibone.

¹¹ None bagose intambwe zacu, Baduhangiye amaso kudutsinda hasi.

¹² Ahwanye n'intare ifite ipfa ry'icyo yafata, Nk'umugunzu w'intare wubikirira mu bico.

¹³ Uwiteka haguruka, Umuhagarare imbere umutsinde hasi. Ukize umutima wanjye umunyabyaha, uwukirishe inkota yawe.

¹⁴ Uwiteka uwukize abantu, uwukirishe ukuboko kwawe. Ni bo bantu b'isi, Bafite umugabane wabo muri ubu bugingo. Inda zabo uzihaze ubutunzi bwawe, Bahāge abana b'abahungu, Ibintu byabo bisigare babisigire impinja zabo.

¹⁵ Jyeweho nzareba mu maso hawe nkiranuka, Mu ikanguka ryanjye nzahaga ishusho yawe.