Zaburi 149 - Bibiliya Yera

¹ Haleluya. Muririmbire Uwiteka indirimbo nshya, Muririmbire ishimwe rye mu iteraniro ry'abakunzi be.

² Ubwoko bw'Abisirayeli bunezererwe umuremyi wabwo, Abana b'i Siyoni bishimire Umwami wabo.

³ Bashimishe izina rye imbyino, Bamuririmbishirize ishimwe, Batambira ishako, batengerera inanga.

⁴ Kuko Uwiteka anezererwa abantu be, Azarimbishisha abanyamubabaro agakiza.

⁵ Abakunzi be bishimire icyubahiro abahaye, Baririmbishwe n'ibyishimo, Baririmbire ku mariri yabo.

⁶ Ishimwe ryo gusingiza Imana ribe mu mihogo yabo, N'inkota ibe mu ntoki zabo,

⁷ yo guhōrēsha amahanga, No guhanisha amoko ibihano

⁸ Bakabohesha abami bayo iminyururu, N'abanyacyubahiro bayo imihama,

⁹ Kugira ngo babasohozeho iteka ryanditswe, Icyo ni icyubahiro cy'abakunzi be bose. Haleluya.