Zaburi 148 - Bibiliya Yera

¹ Haleluya. Nimushimire Uwiteka mu ijuru, Nimumushire ahantu ho mu ijuru.

² Mwa bamarayika be mwese mwe, nimumushime, Mwa ngabo ze zose mwe, nimumushime.

³ Mwa zuba n'ukwezi mwe, nimumushime, Mwa nyenyeri z'umucyo mwe, nimumushime.

⁴ Wa juru risumba amajuru we, mushime, Nawe mazi yo hejuru y'ijuru.

⁵ Bishimire izina ry'Uwiteka, Kuko ari we wategetse bikaremwa.

⁶ Kandi yabikomereje guhama iteka ryose, Yategetse itegeko ridakuka.

⁷ Nimushimire Uwiteka mu isi, Mwa bifi mwe n'imuhengeri hose.

⁸ Nawe muriro n'urubura na shelegi n'igihu, Nawe muyaga w'ishuheri, usohoza ijambo rye.

⁹ Namwe misozi miremire n'udusozi twose, Namwe biti byera imbuto ziribwa n'imyerezi yose.

¹⁰ Namwe nyamaswa n'amatungo yose, Namwe bikururuka n'inyoni zifite amababa.

¹¹ Namwe bami bo mu isi n'amahanga yose, Namwe abakomeye n'abacamanza bo mu isi mwese.

¹² Namwe basore n'inkumi, Namwe basaza n'abana.

¹³ Bishimire izina ry'Uwiteka, Kuko izina rye ryonyine ari ryo rishyirwa hejuru, Icyubahiro cye kiri hejuru y'isi n'ijuru.

¹⁴ Kandi yashyiriye hejuru ubwoko bwe ihembe, Ni byo ashimirwa n'abakunzi be bose, Ari bo bana ba Isirayeli, Ubwoko bumuri bugufi. Haleluya.