Zaburi 147 - Bibiliya Yera

¹ Haleluya, Kuko ari byiza kuririmbira Imana yacu ishimwe, Ni ukw'igikundiro kandi gushima kurakwiriye.

² Uwiteka yongera kūbaka Yerusalemu, Ateranya abimuwe bo mu Bisirayeli.

³ Akiza abafite imitima imenetse, Apfuka inguma z'imibabaro yabo.

⁴ Abara inyenyeri, Azita amazina zose.

⁵ Umwami wacu arakomeye, Ni umunyambaraga nyinshi, Ubwenge bwe ntibugira akagero.

⁶ Uwiteka aramira abanyamubabaro, Acisha abanyabyaha bugufi akabageza hasi.

⁷ Muririmbire Uwiteka mumushimire ibyo yakoze, Muririmbirire ku nanga Imana yacu ishimwe.

⁸ Itwikirize ijuru ibicu, Itunganiriza ubutaka imvura, Imeza ubwatsi ku misozi.

⁹ Igaburira amatungo ibyokurya byayo, N'ibyana by'ibikona bitaka.

¹⁰ Imbaraga z'ifarashi si zo Imana yishimira, Amaguru y'umuntu si yo inezererwa.

¹¹ Uwiteka anezererwa abamwubaha, Anezererwa abategereza imbabazi ze.

¹² Yerusalemu, shima Uwiteka, Siyoni, shima Imana yawe.

¹³ Kuko yakomeje ibihindizo by'amarembo yawe, Yahaye umugisha abana bawe bo muri wowe.

¹⁴ Agira igihugu cyawe kuba icy'amahoro, Aguhaza amasaka ahunze.

¹⁵ Yohereza itegeko rye mu isi, Ijambo rye ryiruka vuba cyane.

¹⁶ Atanga shelegi nk'ubwoya bw'intama, Asandaza ikime cy'imbeho nk'ivu.

¹⁷ Ajugunya urubura rwe nk'ubuvungukira, Ni nde ubasha kurwanya imbeho ze?

¹⁸ Yohereza ijambo rye akabiyagisha, Ahuhisha umuyaga we amazi agatemba.

¹⁹ Amenyesha Abayakobo ijambo rye, Amenyesha Abisirayeli amategeko yandikishije n'amateka ye.

²⁰ Nta rindi shyanga yagiriye atya, Amateka ye ntibayamenye. Haleluya.