Zaburi 145 - Bibiliya Yera

¹ Zaburi iyi y'ishimwe ni iya Dawidi. Mana yanjye, Mwami wanjye ndagushyira hejuru, Nzahimbaza izina ryawe iteka ryose.

² Nzajya nguhimbaza uko bukeye, Nzashima izina ryawe iteka ryose.

³ Uwiteka arakomeye ni uwo gushimwa cyane, Gukomera kwe ntikurondoreka.

⁴ Ab'igihe bazashimira ab'ikindi gihe imirimo yawe, Bababwire iby'imbaraga wakoze.

⁵ Nzavuga ubwiza bw'icyubahiro cyo gukomera kwawe, N'imirimo itangaza wakoze.

⁶ Abantu bazavuga imbaraga z'imirimo yawe iteye ubwoba, Nanjye nzavuga gukomera kwawe.

⁷ Bazībukiriza kugira neza kwawe kwinshi, Baririmbe gukiranuka kwawe.

⁸ Uwiteka ni umunyambabazi n'umunyebambe, Atinda kurakara afite kugira neza kwinshi.

⁹ Uwiteka agirira neza bose, Imbabazi ze ziri ku byo yaremye byose.

¹⁰ Uwiteka, ibyo waremye byose bizagushima, Abakunzi bawe bazaguhimbaza.

¹¹ Bazavuga icyubahiro cy'ubwami bwawe, Bamamaze imbaraga zawe,

¹² Kugira ngo bamenyeshe abantu iby'imbaraga yakoze, N'icyubahiro cy'ubwiza cy'ubwami bwe.

¹³ Ubwami bwawe ni ubw'iteka ryose, Ubutware bwawe buzahoraho ibihe byose.

¹⁴ Uwiteka aramira abagwa bose, Yemesha abahetamye bose.

¹⁵ Amaso y'ibintu byose aragutegereza, Nawe ukabigaburira ibyokurya byabyo igihe cyabyo.

¹⁶ Upfumbatura igipfunsi cyawe, Ugahaza kwifuza kw'ibibaho byose.

¹⁷ Uwiteka akiranuka mu nzira ze zose, Ni umunyarukundo mu mirimo ye yose.

¹⁸ Uwiteka aba hafi y'abamutakira bose, Abamutakira mu by'ukuri bose.

¹⁹ Azasohoza ibyo abamwubaha bashaka, Kandi azumva gutaka kwabo abakize.

²⁰ Uwiteka arinda abamukunda bose, Ariko abanyabyaha bose azabarimbura.

²¹ Akanwa kanjye kazavuga ishimwe ry'Uwiteka, Abafite umubiri bose bajye bahimbaza izina rye ryera iteka ryose.