Zaburi 144 - Bibiliya Yera

¹ Uwiteka, igitare cyanjye ahimbazwe, Wigishe amaboko yanjye kurasana, N'intoki zanjye kurwana.

² Ni we mboneramo imbabazi, Kandi ni igihome kinkingira. Ni igihome kirekire kinkingira n'umukiza wanjye, Ni ingabo inkingira n'uwo niringira, Ni we ungomōrera ubwoko bwanjye ngo mbutegeke.

³ Uwiteka, umuntu ni iki ko umumenya? Cyangwa umwana w'umuntu ko umwitaho?

⁴ Umuntu ameze nk'umwuka gusa, Iminsi ye imeze nk'igicucu gishira.

⁵ Uwiteka, manura ijuru ryawe umanuke, Ukore ku misozi iracumba.

⁶ Urabye imirabyo ubatatanye, Urase imyambi ubirukane.

⁷ Urambure ukuboko kwawe uri mu ijuru, Undohōre unkure mu mazi y'isanzure, Unkize amaboko y'abanyamahanga.

⁸ Akanwa kabo kavuga ibitagira umumaro, N'ukuboko kwabo kw'iburyo ni ukuboko kw'ibinyoma.

⁹ Mana, ndakuririmbira indirimbo nshya, Ndakuririmbira ishimwe kuri nebelu y'imirya cumi.

¹⁰ Ni we uha abami agakiza, Ukiza Dawidi umugaragu we inkota yica.

¹¹ Nyarura unkure mu maboko y'abanyamahanga, Akanwa kabo kavuga ibitagira umumaro, Ukuboko kwabo kw'iburyo ni ukuboko kw'ibinyoma.

¹² Kugira ngo abahungu bacu babe nk'ibiti byikuririza, Bakiri abasore. N'abakobwa bacu bamere nk'amabuye akomeza impfuruka, Abajwe nk'uko babaza amabuye arimbisha inyumba.

¹³ Ngo ibigega byacu byuzure, Birimo imyaka y'imbuto zose, Intama zacu zibyarire ibihumbi n'inzovu mu rwuri rwacu.

¹⁴ Ngo amapfizi yacu agire imitwaro iremereye, Ngo he kugira abatwaranira mu byuho, Cyangwa abasohoka kurwana. Kandi mu nzira zacu he kuba umuborogo.

¹⁵ Hahirwa ubwoko bumera butyo, Hahirwa ubwoko bufite Uwiteka ho Imana yabwo.