Zaburi 139 - Bibiliya Yera

¹ Zaburi iyi yahimbiwe umutware w'abaririmbyi. Ni iya Dawidi. Uwiteka, warandondoye uramenya,

² Uzi imyicarire yanjye n'imihagurukire yanjye, Umenyera kure ibyo nibwira.

³ Ujya urondora imigendere yanjye n'imiryamire, Uzi inzira zanjye zose.

⁴ Kuko ijambo ritaraba mu rurimi rwanjye, Uba umaze kurimenya rwose, Uwiteka.

⁵ Ungose inyuma n'imbere, Unshyizeho ukuboko kwawe.

⁶ Kumenya ibikomeye bityo ni igitangaza kinanira, Kuransumba simbasha kukugeraho.

⁷ Ndahungira Umwuka wawe he? Ndahungira mu maso hawe he?

⁸ Nazamuka nkajya mu ijuru uri yo, Nasasa uburiri bwanjye ikuzimu uri yo.

⁹ Nakwenda amababa y'umuseke, Ngatura ku mpera y'inyanja,

¹⁰ Aho na ho ukuboko kwawe kwahanshorerera, Ukuboko kwawe kw'iburyo kwahamfatira.

¹¹ Nakwibwira nti “Ni ukuri umwijima ni wo uri buntwikīre, Umucyo ungose uhinduke ijoro”,

¹² N'umwijima ntugira icyo uguhisha, Ahubwo ijoro riva nk'amanywa, Umwijima n'umucyo kuri wowe ni kimwe.

¹³ Kuko ari wowe waremye ingingo zanjye, Wanteranirije mu nda ya mama.

¹⁴ Ndagushimira yuko naremwe uburyo buteye ubwoba butangaza, Imirimo wakoze ni ibitangaza, Ibyo umutima wanjye ubizi neza.

¹⁵ Igikanka cyanjye ntiwagihishwe, Ubwo naremerwaga mu rwihisho, Ubwo naremesherezwaga ubwenge mu byo hasi y'isi.

¹⁶ Nkiri urusoro amaso yawe yarandebaga, Mu gitabo cyawe handitswemo iminsi yanjye yose, Yategetswe itarabaho n'umwe.

¹⁷ Mana, erega ibyo utekereza ni iby'igiciro kuri jye! Erega umubare wabyo ni mwinshi!

¹⁸ Nabibara biruta umusenyi ubwinshi, Iyo nkangutse turacyari kumwe.

¹⁹ Mana, icyampa ukica abanyabyaha, Mwa bīcanyi mwe, nimwumve aho ndi.

²⁰ Bakuvuga nabi, Abanzi bawe bavugira ubusa izina ryawe.

²¹ Uwiteka, sinanga abakwanga? Sininuba abaguhagurukira?

²² Mbanga urwango rwuzuye, Mbagira abanzi banjye.

²³ Mana, ndondora umenye umutima wanjye, Mvugutira umenye ibyo ntekereza.

²⁴ Urebe yuko hariho inzira y'ibibi indimo, Unshorerere mu nzira y'iteka ryose.