Zaburi 137 - Bibiliya Yera

¹ Twicaraga ku migezi y'i Babuloni, Tukarira twibutse i Siyoni.

² Ku biti bimera iruhande rw'amazi yo hagati y'i Babuloni, Twari tumanitseho inanga zacu.

³ Kuko abatujyanye ho iminyago badushakiragaho indirimbo aho hantu, Abatunyaze badushakagaho ibyishimo bati “Nimuturirimbire ku ndirimbo z'i Siyoni.”

⁴ Twaririmbira dute indirimbo y'Uwiteka mu mahanga?

⁵ Yerusalemu, ninkwibagirwa, Ukuboko kwanjye kw'iburyo kwibagirwe gukora.

⁶ Ururimi rwanjye rufatane n'urusenge rw'akanwa kanjye, Nintakwibuka, Nintakunda i Yerusalemu, Nkaharutisha ibyishimo byanjye biruta ibindi.

⁷ Uwiteka, ibukira abana ba Edomu, Wa munsi w'i Yerusalemu. Ni bo bavuze bati “Nimuhasenye, Nimuhasenyane n'imfatiro zaho.”

⁸ Wa mukobwa w'i Babuloni we, utazabura kurimburwa, Hazahirwa uzakwitura ibihwanye n'ibyo watugiriye.

⁹ Hazahirwa uzafata abana bawe bato, Akabahonda ku rutare.