Zaburi 135 - Bibiliya Yera

¹ Haleluya. Nimumushime, mwa bagaragu b'Uwiteka mwe,

² Bahagarara mu nzu y'Uwiteka, Mu bikari by'inzu y'Imana yacu.

³ Mushimire Uwiteka yuko Uwiteka ari mwiza, Muririmbire izina rye ishimwe, Kuko ari iry'igikundiro.

⁴ Kuko Uwiteka yitoranirije Abayakobo, Abisirayeli yabatoranirije kuba amaronko ye.

⁵ Kuko nzi yuko Uwiteka akomeye, Kandi yuko Umwami wacu asumba ibigirwamana byose.

⁶ Icyo Uwiteka ashaka cyose ajye agikorera mu ijuru no mu isi, Mu nyanja n'imuhengeri hose.

⁷ Acumbisha ibihu bikava ku mpera y'isi, Aremera imvura imirabyo, Asohora umuyaga mu bubiko bwe.

⁸ Ni we wakubise abana b'imfura bo muri Egiputa arabīca, Ab'abantu n'ab'amatungo.

⁹ Yohereje ibimenyetso n'ibitangaza hagati yawe Egiputa, Kuri Farawo no ku bagaragu be bose.

¹⁰ Ni we wakubise amahanga menshi, Yica abami bakomeye:

¹¹ Sihoni umwami w'Abamori, Na Ogi umwami w'i Bashani, N'abami b'ibihugu by'i Kanāni bose,

¹² Atanga ibihugu byabo ngo bibe umwandu, Umwandu w'Abisirayeli ubwoko bwe.

¹³ Izina ryawe Uwiteka, rihoraho iteka ryose, Urwibutso rwawe Uwiteka, ruhoraho ibihe byose.

¹⁴ Kuko Uwiteka azacira imanza ubwoko bwe, Kandi azahindurira abagaragu be umutima.

¹⁵ Ibishushanyo abanyamahanga basenga ni ifeza n'izahabu, Umurimo w'intoki z'abantu.

¹⁶ Bifite akanwa ntibivuga, Bifite amaso ntibirora,

¹⁷ Bifite amatwi ntibyumva, Kandi nta mwuka uri mu kanwa kabyo.

¹⁸ Ababirema bazahwana na byo, N'ubyiringira wese.

¹⁹ Wa nzu y'Abisirayeli we, muhimbaze Uwiteka, Wa nzu y'aba Aroni we, muhimbaze Uwiteka.

²⁰ Wa nzu y'aba Lewi we, muhimbaze Uwiteka, Mwa bubaha Uwiteka mwe, muhimbaze Uwiteka.

²¹ Bahimbarize i Siyoni Uwiteka, Utuye i Yerusalemu. Haleluya.