Zaburi 132 - Bibiliya Yera

¹ Indirimbo y'Amazamuka. Uwiteka, ibukira Dawidi imibabaro ye yose,

² Yuko yarahiye Uwiteka indahiro, Yahize Intwari ya Yakobo umuhigo,

³ Ati “Ni ukuri sinzinjira munsi y'ipfundo ry'inzu yanjye, Sinzurira urutara rwanjye.

⁴ Sinzaha amaso yanjye ibitotsi, N'ibihene byanjye sinzabiha gusinzira,

⁵ Ntarabonera Uwiteka ahantu, Ntarabonera Intwari ya Yakobo ubuturo.”

⁶ Dore twumviye Efurata bakivuga, Twakibonye mu kigarama cy'i Yāri.

⁷ “Twinjire mu buturo bwayo, Dusengere imbere y'intebe y'ibirenge byayo.”

⁸ Uwiteka, haguruka winjire mu buruhukiro bwawe, Wowe ubwawe n'isanduku y'imbaraga zawe.

⁹ Abatambyi bawe bambare gukiranuka, Abakunzi bawe bavuze impundu.

¹⁰ Ku bwa Dawidi umugaragu wawe, Ntuhēze uwo wasīze.

¹¹ Uwiteka yarahiye Dawidi indahiro y'ukuri, Ntazīvuguruza ati “Nzashyira uwo mu mbuto z'umubiri wawe ku ntebe yawe y'ubwami.

¹² Abana bawe nibitondera isezerano ryanjye, N'ibyo nzahamya nkabigisha, N'abana babo bazicara ku ntebe yawe y'ubwami iteka ryose.”

¹³ Kuko Uwiteka yatoranije Siyoni, Yahashakiye kuba ubuturo bwe.

¹⁴ Ati “Aha ni ho buruhukiro bwanjye iteka ryose, Aha ni ho nzaba kuko nahashatse.

¹⁵ Nzaha ibyokurya byaho umugisha mwinshi, Nzahaza abakene baho umutsima.

¹⁶ Kandi abatambyi baho nzabambika agakiza, Abakunzi banjye baho bazavuza impundu cyane.

¹⁷ Ni ho nzamereza Dawidi ihembe, Uwo nasīze namwiteguriye itabaza.

¹⁸ Abanzi be nzabambika isoni. Ariko kuri we ikamba rizarabagirana.”