Zaburi 13 - Bibiliya Yera

¹ Zaburi iyi yahimbiwe umutware w'abaririmbyi. Ni iya Dawidi.

² Uwiteka, uzageza he kunyibagirwa iteka ryose? Uzageza he kunyima amaso?

³ Nzageza he kwigira inama, Mfite agahinda mu mutima wanjye uko bukeye? Umwanzi wanjye azageza he gushyirwa hejuru yanjye?

⁴ Uwiteka Mana yanjye, birebe unsubize, Hwejesha amaso yanjye, Kugira ngo ne gusinzira ibitotsi by'urupfu.

⁵ Umwanzi wanjye ye kuvuga ati “Ndamunesheje”, Abanteraga be kwishimira kunyeganyega kwanjye.

⁶ Ariko niringiye imbabazi zawe, Umutima wanjye uzishimira agakiza kawe. Ndaririmbira Uwiteka, Kuko yangiriye neza.