Zaburi 129 - Bibiliya Yera

¹ Indirimbo y'Amazamuka. Bambabaje kenshi uhereye mu buto bwanjye, Abe ari ko ubwoko bw'Abisirayeli buvuga none.

² Bambabaje kenshi, uhereye mu buto bwanjye, Ariko ntibanesheje.

³ Abahinzi bahinze ku mugongo wanjye, Bahaciye impavu ndende.

⁴ Uwiteka ni umukiranutsi, Yaciye ingoyi abanyabyaha banshyizeho.

⁵ Abanga i Siyoni bose, Bakorwe n'isoni basubizwe inyuma.

⁶ Babe nk'ubwatsi n'imyaka bimeze ku mapfundo y'amazu, Byuma bitarakura.

⁷ Ibyo umusaruzi atuzuza ikiganza cye, Cyangwa uhambira imiba atuzuza igikondorero cye.

⁸ Abahisi ntibavuge bati “Umugisha w'Uwiteka ube kuri mwe, Tubasabiye umugisha mu izina ry'Uwiteka.”